Kombëtarja e Shqipërisë po i vazhdon përgatitjet para ndeshjes së parë të këtij muaji në Ligën e Kombeve.
Gjërat duket se po shkojnë sipas planit për selektorin Sylvinho, ndërsa Indrit Tuci e Ylber Ramadani në konferencën për shtyp të mërkurën zbuluan se si po shkojnë përgatitjet e “kuqezinjve”.
Si sulmuesi ashtu edhe mesfushori, insistuan se fillimisht janë të fokusuar te ndeshja me Çekinë, përpara se të mendojnë për duelin me Ukrainën.
Shqipëria, të shtunën luan me Çekinë kurse tri ditë më vonë përballet me Ukrainën, ndeshje këto që do t’i luaj në stadiumin “Air Albania” në Tiranë.
I grumbulluar për herë të dytë me Kombëtaren, Indrit Tuci vlerësoi çekët për lojën që bëjnë, ndërsa theksoi se kuqezinjtë po marrin masat e duhura për të dyja ndeshjet.
Ai tregoi se është në gjendje të mirë fizike dhe tha se është gati për të dhënë maksimumin e tij nëse trajneri i jep mintazhë dhe insistoi se kuqezinjtë luajnë për kombin shqiptar, si dhe shpreson të shënojë edhe gol te këto sfida.
“Vetëm të luaj para tifozëve në ‘Air Albania’ është ndjenjë e veçantë. Shpresoj shumë që të shënoj edhe gol. Nuk ka rëndësi se kush shënon. Nëse shënon Ramadani do të jem dyfish më i lumtur. Çdo ditë e mendoj debutimin në Tiranë. E mendoj edhe golin dhe si mund të shënoj. Objektivi im është që të jap më të mirën dhe të ndihmoj ekipin. Goli është i mirëseardhur, nëse vjen”, ka thënë Tuci.
Ndërkohë, Ylber Ramadani vlerësoi të dy kundërshtarët dhe theksoi se fokusi është te ndeshja me Çekinë duke nënvizuar se Kombëtarja do të japë maksimumin për të marrë rezultat pozitiv në të dyja takimet.
“Të dy kundërshtarët janë të fortë, kanë luajtur në Evropian. Synimi i tyre është kualifikimi, por ne mendojmë vetëm për ndeshjen e radhës me Çekinë, e më pas për atë me Ukrainën. Nuk do të jetë lehtë pasi janë kundërshtarë të fortë. Çekia është skuadër fizike, por ne po përgatitemi. Avantazhi ynë i vetëm janë tifozët që do t’i kemi në ‘Air Albania’. Do të jenë shtysë e madhe për ne”, ka thënë të mërkurën në konferencë për shtyp mesfushori Ylber Ramadani.
Shqipëria i ka gjashtë pikë në vendin e tretë, sa edhe Gjeorgjia në të dytin. Çekia e kryeson grupin me shtatë pikë, ndërsa Ukraina i ka katër. Çdo gjë mbetet e hapur për vendin e parë në grup, që siguron kalimin në Ligën A.
Sylvinho përballet me mungesa të shumta para ndeshjeve vendimtare. Armando Broja, Berat Gjimshiti, Keidi Bare, Marash Kumbulla, Rey Manaj janë prej lojtarëve që mungojnë. Adrian Bajrami, Jon Mersinaj e Arbnor Muja janë prej lojtarëve që u ftuan më vonë, pas konfirmimit të mungesave të shumta.
