Presidenti amerikan, Donald Trump e ka bërë të qartë se po humbet durimin me Putinin, duke drejtuar kritika të ashpra ndaj liderit rus, ndërsa Moska vazhdon sulmet me dronë dhe raketa në Kiev dhe qytete të tjera ukrainase për të tretën natë me radhë.
“Gjithmonë kam pasur një marrëdhënie shumë të mirë me Vladimir Putinin, por diçka i ka ndodhur atij. Është çmendur plotësisht!”, shkroi Trump në rrjetet sociale të dielën në mbrëmje.
Trump kritikoi Putinin për vrasjet e shumta të panevojshme, duke theksuar se “raketa dhe dronë po qëllohen në qytete të Ukrainës pa ndonjë arsye të drejtë”.
Sipas autoriteteve ukrainase, sulmi i fundit ajror është më i fuqishmi që nga fillimi i pushtimit rus në shkurt të vitit 2022. Të paktën 12 persona humbën jetën, ndërsa dhjetëra të tjerë u plagosën.
Presidenti amerikan paralajmëroi se nëse Putini synon të pushtojë të gjithë Ukrainën, kjo do të çojë në “rënien e Rusisë”.
Megjithatë, Trump shprehu edhe zhgënjimin e tij ndaj Presidentit ukrainas Volodymyr Zelenskyy, duke thënë se ai “nuk po i bën nder vendit të tij me mënyrën se si po komunikon”.
“Çdo gjë që del nga goja e tij shkakton probleme, nuk më pëlqen dhe më mirë të ndalet”, shkroi Trump në rrjetet sociale.
Që prej kohësh, Trump është shfaqur i acaruar ndaj Putinit dhe vështirësive për të gjetur një zgjidhje për luftën që tashmë zgjat tre vjet, një konflikt që ai kishte premtuar ta përfundonte shpejt gjatë fushatës për rikthim në Shtëpinë e Bardhë.
Ai ka mbajtur prej kohësh një qëndrim se ka pasur një marrëdhënie të mirë me Putinin dhe ka theksuar se Rusia duket më e gatshme sesa Ukraina për një marrëveshje paqeje.
Por muajin e kaluar, Trump i kërkoi Putinit që të “ndalojë” sulmet ndaj Ukrainës, pasi Rusia nisi një tjetër valë sulmesh të rënda mbi Kievin. Ai ka shprehur vazhdimisht zhgënjimin e tij që lufta vazhdon.
“Nuk jam i kënaqur me atë që po bën Putini. Ai po vret shumë njerëz. Nuk e di se çfarë i ka ndodhur atij”, tha Trump për gazetarët të dielën, ndërsa largohej nga veriu i New Jersey-t, ku kishte kaluar fundjavën.
