Presidenti amerikan, Donald Trump ka pohuar se Irani ka rënë dakord të zhvillojë bisedime në Doha, pasi SHBA-të dhe Irani shkëmbyen zjarr në ngushticën e Hormuzit këtë fundjavë.
Në një postim të shkurtër në Truth Social, presidenti amerikan pretendoi se takimet do të zhvilloheshin në kryeqytetin e Katarit, ndërsa mediat amerikane raportuan se të dyja palët kishin rënë dakord të ndalonin sulmet
“Irani kërkoi një takim. Ai do të zhvillohet nesër në Doha”, shkroi Trump.
Të dërguarit e Shtëpisë së Bardhë, Steve Witkoff dhe Jared Kushner, do të fluturojnë për në Doha për takimin për të diskutuar memorandumin e mirëkuptimit, tha zëdhënësja e Shtëpisë së Bardhë, Karoline Leavitt.
Diskutimet e nivelit të lartë pritet të zhvillohen në margjinat e negociatave në nivel teknik, tha ajo për Fox News.
Megjithatë, më herët gjatë ditës, zëvendësministri i Jashtëm i Iranit, Kazem Gharibabadi, tha se “nuk janë planifikuar bisedime teknike” me SHBA-në këtë javë në Doha, duke hedhur poshtë raportet e mediave amerikane. Por ai shtoi se konsultimet me ndërmjetësit vazhduan.
Axios kishte raportuar më parë se SHBA-të dhe Irani, pas sulmeve të fundit, ranë dakord të zgjidhnin mosmarrëveshjet e tyre mbi Ngushticën e Hormuzit, të cilën Teherani e mbylli pasi SHBA-të dhe Izraeli nisën sulmet në fund të shkurtit.
