Presidenti amerikan, Donald Trump ka paralajmëruar se Shtetet e Bashkuara do të ndërmarrin sulme të forta ndaj Iranit gjatë natës së së enjtes, ndërsa tensionet mes dy vendeve vazhdojnë të rriten dhe bisedimet e paqes raportohet se kanë ngecur.
Në një postim në rrjetin e tij social Truth Social, Trump ka deklaruar se SHBA-të do të godasin Iranin “shumë fort”, duke përmendur kapacitete ushtarake si Marina, Forcat Ajrore, radari dhe sistemet kundërajrore, të cilat sipas tij janë tashmë të dëmtuara rëndë.
“Shtetet e Bashkuara do ta godasin Iranin (marina, forcat ajrore, radari, armët kundërajrore dhe të gjitha format e tjera të mbrojtjes së të cilit, së bashku me pjesën më të madhe të aftësive të tij sulmuese, janë zhdukur), shumë fort sonte”, ka shkruar ai.
Ai ka shtuar gjithashtu se Shtetet e Bashkuara në të ardhmen mund të marrin kontrollin e ishullit Kharg dhe infrastrukturës tjetër të naftës së Iranit.
Ky ishull në Gjirin Persik përbën një pikë kyçe, pasi përmes tij kalon pjesa më e madhe e eksporteve të naftës bruto të vendit.
“Në një moment në të ardhmen jo shumë të largët, ne do të marrim ishullin Kharg dhe pika të tjera të infrastrukturës së naftës, dhe do të marrim kontrollin e plotë të tregjeve të tyre të naftës dhe gazit, ashtu siç kemi bërë me Venezuelën, e cila po funksionon shkëlqyeshëm si për Venezuelën ashtu edhe për Shtetet e Bashkuara të Amerikës”, ka përfunduar Trumpi./teve1.info/
