Gjykata Speciale u miratua në verën e vitit 2015 përmes ndryshimeve kushtetuese që ishin miratuar nga vetë deputetët.
E punën që po bëhet nga Dhomat e Specializuara e ka kritikuar ashpër Hulumtuesja e Tribunalit Ndërkombëtar të Hagës, Nevenka Tromp.
Prandaj fjalimin e kryeministrit shqiptar, Edi Rama, po e cilëson si të rëndësishëm pavarësisht ndikimit të vogël që mund të ketë.
Por sipas hulumtueses në këtë fazë është e vështirë që të zhbëhet Gjykata Speciale.
“Fjalimi politik i Kryeministrit të Shqipërisë, Edi Rama, në Këshillin e Evropës ishte i rëndësishëm por duhet ta kemi parasysh që Gjykata Speciale nuk mund të zhbëhet nga ky Këshill. Është e vështirë që përmes politikës të ndërhyhet në punën e Gjykatës Speciale, e cila tashmë funksionon në mënyrë të pavarur. Natyrisht që ka hapësirë për kritikë për punën që po bëhet”, tha ajo.
Tromp, thotë se të drejtat e njeriut po shkelen nga Gjykata Speciale, sepse ende nuk ka filluar gjykimi ndaj disa prej të akuzuarve.
“Po të drejtat e njeriut po shkelen, sepse akoma nuk po fillon procesi i gjykimit për disa nga ish-krerët e Ushtrisë Çlirimtare të Kosovës. Po shkon shumë gjatë ky proces dhe nuk është në rregull të veprohet në këtë mënyrë. Ata janë marrë nga shtëpitë e tyre dhe po procesin akoma për gjykim, ata janë të privuar nga liria”, u shpreh ajo.
Nevenka Tromp, tregon se nga kjo situatë është duke përfituar shteti serb, që përmes kësaj gjykate po tenton të prish imazhin e shtetit të Kosovës dhe rrjedhimisht kjo po ndikon në procesin e dialogut.
“Më e keqja është se nga kjo situatë po përfitojnë ata që kundërshtojnë pavarësinë e Kosovës. Pra mungesa e një vendimi final për të akuzuarit, po krijon hapësira që imazhi i Kosovës të dëmtohet. Zyrtarët serbë po e përdorin Gjykatën Speciale, për të përfituar politikisht në procesin e dialogut që po zhvillohet në Bruksel, ndërmjet Kosovës dhe Serbisë. Kjo situatë po i shkon përshtati vetëm Serbisë dhe kjo duhet thënë”, shtoi Tromp.
Ditë më parë Kryeministri i Shqipërisë, Edi Rama, iu bëri thirrje vendeve perëndimore që t’i rrëzojnë akuzat e ngritura ndaj ish-luftëtarëve të UÇK-së, në Dhomat e Specializuara.
Kronikën e gazetarit Shpat Blakçori mund ta ndiqni në videon e mëposhtme nga minuta 11:45.