Pas Reimsit të Arbër Zenelit, një tjetër klub francez ka shkarkuar trajnerin. Montpellier, një ndër tri klubet që ia ka dalë t’i rrëmbejë titullin kampion PSG-së gjatë epokës që sheikëve (bashkë me Monaco dhe Lille), ka ndërprerë bashkëpunimin me Olivier Dall’Oglio.
Humbja në fundjavë ndaj Lensit, ka rezultuar fatale për 58-vjeçarin, i cili qëndronte në pankinën e Montpellier prej qershorit të vitit të kaluar. “La Paillade” nuk kanë marrë asnjë pikë në tri ndeshjet e fundit dhe renditen në vendin e 11-të në kampionatin francez të futbollit.
Drejtuesit e klubit nuk kanë humbur shumë kohë dhe kanë zgjedhur t’i besojnë përkohësisht stolin e skuadrës Romain Pitau, i cili mbante postin e ndihmësit të Dall’Oglio. Montpellier ka fituar vetëm një herë titullin kampion në Francë.
Ishte sezoni 2011/2012 kur skuadra e drejtuar nga e Rene Girard triumfonte përballë PSG-së së Carlo Ancelottit. Ylli i ekipit ishte Oliver Giroud, i cili shpallej golashënuesi më i mirë i atij sezoni në Ligue 1, teksa pjesë e Montpellier ishin edhe emra si kapiteni Yanga-Mbiëa apo marokeni Belhanda.
