Kompania e “Trafikut Urban” në Prishtinë ka bërë të ditur se e ka të pamundur shlyerjen e obligimeve ndaj furnitorëve dhe fillimin e operimit pa transferimin e mjeteve.
Në një komunikatë për media nga kjo kompani kanë thënë se pavarësisht vendimit të Kuvendit Komunal të Prishtinës për alokim të mjeteve duhet transferimi nga niveli qendror, gjë për të cilin kanë kërkuar që të bëhet sa më shpejt.
Poashtu ata kanë bërë të ditur se protestat e tyre do të vazhdojnë deri në plotësimin e kërkesave.
“Megjithëse sot Kuvendi Komunal ka votuar bartjen e mjeteve buxhetore nga viti 2024, duhet theksuar qartë se këto mjete mund të bëhen të përdorshme vetëm pas transferimit të tyre nga institucionet qendrore. Deri në realizimin e këtij hapi, N.P.K. “Trafiku Urban” SHA mbetet në pamundësi financiare për të shlyer obligimet ndaj furnitorëve, e rrjedhimisht edhe për të rifilluar operimin normal. Për këtë arsye e shohim të arsyeshme dhe të domosdoshme që të gjitha institucionet përgjegjëse, përfshirë ministrinë përkatëse, të përshpejtojnë të gjitha procedurat e transferimit, në mënyrë që ndërmarrja të mund t’i kthehet menjëherë shërbimit publik. Deri në përmbushjen e këtyre obligimeve, dhe për sa kohë mbetet e pamundur të rifillojmë operimin, protesta e paralajmëruar nga punëtorët e Trafikut Urban do të vazhdojë”, thuhet në komunikatë.
Nga kjo kompani kanë njoftuar qytetarët se për të gjitha biletat mujore të paguara, do të kompensohen ditët në të cilat shfrytëzuesit nuk kanë mundur të përdorin shërbimin e transportit.
