Kryetari i Prizrenit, Shaqir Totaj, ka folur në emisionin “Ditari” në Tëvë1 për mandatin e tij aktual, projektet e realizuara dhe sfidat e bashkëpunimit me qeverinë.
Totaj tha se puna e bërë gjatë katër viteve është e dukshme dhe kjo ka rritur besimin e qytetarëve.
“Në vitin 2021 ka qenë më e vështirë t’i bindim qytetarët që të na besojnë, kurse tash duket më e lehtë, sepse puna jonë katërvjeçare është diçka që shihet, është diçka që preket. Qytetarët më shumë u besojnë punëve e veprave sesa fjalëve,” u shpreh Totaj.
Ai përmendi disa nga projektet kryesore që, sipas tij, kanë ndryshuar qytetin:
“Unë mburrem me shumë projekte në Prizren, por disa prej tyre po i veçoj: hapja e rrugës së transitit, që ka qenë e bllokuar për 15 vite; rivitalizimi i sheshit të Shatërvanit; si dhe rregullimi i trotuareve,” tha ai.
Totaj gjithashtu kritikoi mungesën e bashkëpunimit nga qeveria qendrore.
“Në fillim kemi pritur një bashkëpunim të madh me qeverinë, mirëpo faktikisht ajo nuk ka ndodhur. Kemi pasur një qasje jo bashkëpunuese, projektet e Prizrenit nuk janë përkrahur, dhe kjo normalisht ka sjellë vështirësi,” theksoi Totaj.
