Aplikacioni Threads i Meta-s tani mund të krenohet me mbi 400 milionë përdorues aktivë në muaj, ka konfirmuar drejtuesi i Instagramit, Adam Mosseri.
Në një postim që shënonte këtë sukses, Mosseri u ndal te rrugëtimi dyvjeçar nga “një ide e çmendur për të konkurruar me Twitter-in” deri te një platformë që synon një bisedë të hapur dhe të civilizuar.
Threads u lançua në korrik të vitit 2023 dhe arriti 100 milionë përdorues brenda vetëm pesë ditësh.
Angazhimi i hershëm ra shpejt, por aplikacioni u rikuperua me një rritje të qëndrueshme. Deri në mesin e vitit 2024 arriti në 175 milionë përdorues, 300 milionë në dhjetor dhe 350 milionë në prill.
Megjithëse mbresëlënëse, Threads ende mbetet pas X (ish-Twitter), i cili ka rreth 650 milionë përdorues aktivë në muaj.
Ky hendek është ngushtuar falë integrimit me Instagramin, që u mundëson përdoruesve të importojnë lehtësisht ndjekësit e tyre.
Kundërthëniet e X-it nën drejtimin e Elon Musk, nga funksionet me pagesë deri te moderimi më i lehtë, i kanë shtyrë disa përdorues të kërkojnë alternativa.
Threads është mbështetur në këtë duke u prezantuar si një alternativë më e qetë, megjithëse kritikët thonë se ende i mungon një identitet i qartë, duke paralajmëruar se rrezikon të shihet thjesht si një “Instagram me tekst”.
Threads vazhdon të shfaqë veçori të reja për t’u dhënë përdoruesve edhe më shumë liri krijuese.
Threads po prezanton një veçori të re që u jep përdoruesve më shumë hapësirë për t’u bërë kreativë në postimet e të tjerëve.
Aplikacioni tani ka një mjet shënimi i cili i lejon përdoruesit të shkruajnë mbi postimet që duan të rishpërndajnë.
Kreu i Instagramit, Adam Mosseri, e ndau lajmin në Threads. Veçoria e shënimit shfaqet kur citoni ose ripostoni një postim.
Mosseri gjithashtu tha se më shumë veçori do të vijnë së shpejti nga Meta.
