Për më shumë se 40 minuta pritën në radhë.
Pozicionin e mikpritjes e zunë për kryeministrin e vendit.
Ky i fundit u vonua, çka solli shtyrje të agjendës.
Por kjo nuk e zbehi interesimin për ta prit shefin e ekzekutivit, i cili erdhi
bashkë me ministrin e Mbrojtjes, Ejup Maqedonci.
Të dy bën homazhe tek varret e të vrarëve në Masakrën e Dyzit në Podujevë.
Ata nderuan veç e veç secilin të vrarë nga forcat serbe me 18 prill të vitit 1999.
“Mbi 200 civilë të paarmatosur, të pambrojtur, pa kursyer moshat e shtyera, as fëmijët e vegjël. Dhe gjithashtu, sot e kësaj dite, ndonëse e kemi lirinë, pavarësinë, shtetin e demokracionë, nuk e kemi drejtësinë për këto humbjet e tmerrshme që i ka përjetuar populli”, ka deklaruar Kurti.
Prandaj, për ta u kërkua që organet e drejtësisë të vihen në lëvizje.
“I bëj thirrje edhe një herë, prokurorisë dhe gjyqësorit tek ne, që të bëjnë gjithë çfarë munden, e dijnë, të intervistojnë e të dëgjojnë dëshmitarë, të grumbullojnë evidencat materiale, dhe të fillojnë me aktakuza, gjykime e dënime në mungesë, për të vrarët në këtë rajon”, ka thënë Kurti.
Në këtë organizim, i pranishëm ishte edhe kryetari i komunës së Podujevës, Shpejtim Bulliqi.
