Prokuroria Themelore në Gjakovë ka paraqitur kërkesë për caktimin e masës së paraburgimit ndaj një personi me inicialet V.K., i dyshuar për tentim vrasje ndaj një personi tjetër me inicialet R.B.
Sipas Prokurorisë, ngjarja ka ndodhur më 14 shtator 2025, rreth orës 11:00, në pjesën e jashtme të një kafiterie në rrugën “Washington” në Gjakovë, ku i dyshuari, pas një mosmarrëveshjeje me viktimën, e ka goditur atë disa herë me thikë në pjesë të ndryshme të trupit.
“Sipas kërkesës së Prokurorisë, ndër të tjera ceket se ekziston dyshimi i bazuar se i pandehuri me inicialet V.K., më datë 14.09.2025 rreth orës 11:00, në rrugën “Washington” Gjakovë, saktësisht në pjesën e jashtme të kafiterisë “C.P.” me dashje ka tentuar të privoj nga jeta të dëmtuarin R.B., në atë mënyrë që ditën dhe momentin kritik i pandehuri pas një mosmarrëveshje me të dëmtuarin, me mjetë të mprehtë – thikë, që e posedonte me vete e sulmon të dëmtuarin duke e goditur tri herë në pjesët vitale të trupit, respektivisht dy herë në stomak dhe në dorë, ku si pasojë e lëndimeve të pësuara nga goditjet me thikë, i dëmtuari menjëherë dërgohet në emergjencën e Spitalit Rajonal “Isa Grezda” në Gjakovë dhe më pas për shkak të gjendjes së rëndë shëndetësore, dërgohet në QKUK për trajtim mjekësor”, thuhet në njoftim.
I pandehuri bëhet e ditur se është arrestuar menjëherë pas ngjarjes dhe ndodhet në ndalim prej 48 orësh, ndërsa Prokuroria ka kërkuar nga Gjykata caktimin e paraburgimit prej 30 ditësh.
