Mbrojtësi i krahut të djathtë, Armend Thaqi, është shpallur lojtari më i mirë i xhiros së 11-të në Superligën e Kosovës në futboll.
Federata e Futbollit të Kosovës, të hënën ia ka ndarë Thaqit çmimin “Ylli i Javës”, vlerësimi i të cilit bëhet nga komisioni i veteranëve të futbollit.
Thaqi ishte ndër më të dalluarit te Ballkani dhe më i merituari që ekipi nga Suhareka e mori një pikë në ndeshjen kundër Drenicës, që u luajt të dielën në Skenderaj dhe përfundoi 1:1.
Ai shënoi golin e barazimit për Ballkanin në minutën e 81-të dhe këtë edicion është njëri prej bartësve të lojës te kampioni në fuqi.
“Ky çmim për mua është i rëndësisë së lartë, sepse Superliga e Kosovës është gara në të cilën unë jam rritur dhe jam zhvilluar si lojtar, dhe çdoherë kur shpërblehem për ndeshjet në këtë ligë për mua është kënaqësi e veçantë”, ka thënë ndër të tjera Thaqi.
