Ish-presidenti i Kosovës, Hashim Thaçi, në fjalimin e tij të mbajtur para trupit gjykues në Gjykatën Speciale, ka thënë se kushdo që do të ishte në pozitën e tij do t’i bënte të njëjtat gjëra, që Thaçi i ka bërë gjatë rrugës së tij politike.
Thaçi ka thënë se rruga drejtë lirisë ishte e gjatë dhe shumë e vështirë, raporton teve1.info.
“Rruga jonë drejtë lirisë ishte e gjatë dhe shumë e vështirë, unë isha student në Zvicër i strehuar politik kur u masakrua familja e Jasharëjve në mars të vitit 1998. Si shumë shqiptarë nga diaspora edhe unë u ktheva për të ndihmuar vendin tij dhe ju bashkova rezistencës për lirinë në Kosovë. Kushdo që do të ishte në vendin tonë do të kishte bërë të njëjtën gjë, kur t’u hiqej liria”, ka thënë Thaçi gjatë fjalimit të tij.
Tutje, ish-drejtuesi i Ushtrisë Çlirimtare të Kosovës, ka thënë se UÇK është përbërë nga njerëz të thjesht që janë përpiqur t’i mbrojnë familjarët e tyre.
“UÇK përbëhej nga njerëz të thjesht, vullnetarë që përpiqeshin të mbronin shtëpitë, familjet dhe vendbanimet e tyre. Ata luftuan dhe shumica vdiqën si trima e hero. Ky ishte çmimi i lirisë. Mijëra familje humbën të dashurit e tyre në qindra masakra të kryera nga forcat serbe”, është shprehur Thaçi.
Thaçi ka deklaruar se kundërshtarët e UÇK-së ishin ushtria, policia dhe paralimitarët serb.
“Kundërshtarët tanë ishin ushtria, policia dhe paralimitarët serb, të kalitur në fushatat e tyre të vrasjeve në Bosnje”. /teve1.info/
