Në ish-Shkollën Teknike në Obiliq janë gjetur disa pajisje dhe gjësende të dyshimta, për të cilat dyshohet se mund të jenë përdorur për kultivimin e substancave narkotike.
Kryetari i Obiliqit, gjatë vizitës në vendin e ngjarjes, ka thënë se punëtorët e pastrimit kanë hasur në këto gjësende gjatë punës në objekt dhe për shkak të dyshimeve kanë njoftuar Policinë e Kosovës.
Sipas tij, nga vlerësimi fillestar i policisë dhe njësive kundër narkotikëve, bëhet fjalë për një tentim të mundshëm të kultivimit të substancave narkotike, ndërsa ende nuk dihet se për çfarë substancash bëhet fjalë.
Ai ka treguar se objekti i ish-Shkollës Teknike ka qenë i braktisur dhe i keqpërdorur ndër vite.
Sipas tij, nxënësit kanë zhvilluar mësimin në këtë objekt deri në vitin 1990, kur, siç u shpreh ai, masat e dhunshme të Serbisë i larguan nxënësit nga shkolla.
Kryetari ka bërë të ditur gjithashtu se para rreth dy muajsh në objekt ishte zbuluar edhe një ambulancë e fshehur, për të cilën kishte njoftuar Policinë e Kosovës dhe Prokurorinë e Shtetit.
“Deri në vitin 1990 nxënësit këtu kanë mbajtur mësim këtu në këtë objekt, nga viti 1990 kur masat e dhunshme të shtetit kriminal serb na i kanë larguar nxënësit nga shkolla, kjo shkollë ka qenë thuajse e përdorur e keqpërdorur prej individëve të ndryshëm. Para dy muajve ne kemi hasur në një ambulantë të fshehur nga strukturat paralele serbe, gjë të cilën i kemi informuar edhe Policinë e Kosovës dhe Prokurorin e Shtetit dhe natyrisht që dje kemi hasur në disa gjësende shumë të dyshimta për ne që punëtorët tanë nuk kanë mundur të vazhdojnë punën pa e ftuar policinë që të merret me këto gjëra, sipas policisë dhe antidrogës shihet që është tentim i një kultivimi të disa substancave narkotike, por nuk dihet çfarë substancash”, ka deklaruar Thaçi./teve1.info/
