Gjyqit maratonik për krime lufte po i vie fundi.
Mirëpo, Hashim Thaçi, ka edhe një betejë në Gjykatën Speciale.
Ndaj tij rëndon një akuzë tjetër.
Gjyqi për pengim të administrimit të drejtësisë, për Thaçin do të jetë procesi gjyqësor i dytë që do ta kalojë në Hagë, e që pritet të fillojë në muajin shkurt të vitit të ardhshëm.
Përkundër këtyre dy rasteve, masa e paraburgimit ndaj tij, po vlerësohet se ka tejkaluar limitet.
“Vepra penale tjetër që po akuzohet Thaçi ka ta bëjë me pengimin në drejtësi, unë mendoj se pavarësisht se ai ka një procedurë tjetër prapë nuk është arsye që ai të qëndrojë në masën e paraburgimit. Ka kalu shumë kohë, janë bërë shumë vite, dhe kjo i cënon gjitha konventat”, tha avokati Arbër Jashari.
Thaçi, sikurse në gjyqin për krime lufte, edhe në atë për pengim të drejtësisë, ndodhet në aktakuzë të përbashkët me disa persona të tjerë.
Ai bashkë me Isni Kilaj, Bashkim Smakaj, Fadil Fazliu e Hajredin Kuçi ndodhen në bankën e të akuzuarve.
Sipas aktakuzës së Zyrës së Prokurorit të Specializuar, Thaçi përmes takimeve me këta persona në qendrën e paraburgimit, ka ndikuar në dëshmitarë.
Madje sipas dosjeve të prokurorisë, takime e biseda Thaçi kishte pasur edhe me disa persona të tjerë që akuzohen për pengim në drejtësi e ndikim në dëshmitarë, të cilët veçse kanë e kanë pranuar fajin para Gjykate.
E sa mundet që kjo, të ndikojë tek pozicioni i Thaçit?
“I pandehuri është përgjegjës për veprimet e tij dhe deklarata e tij mund të mirret si dëshmi për veprimet individuale të të pandehurit, por në asnjë rrethanë nuk mund të merret si provë në dëm të të pandehurit tjetër. Në këtë rast, ata që kanë pranuar fajësinë, pranimi i fajësisë ka të bëjë vetëm me ata, në mënyrë individuale, dhe nuk mund të lidhet Thaçi apo ndonjë i akuzuar tjetër, me faktin se këta e kanë pranuar fajin”.
Në rastin për pengim të drejtësisë, Zyra e Prokurorit të Specializuar ka deklaruar se është në fazën finale të hetimeve të saj.
