Skender Thaçi, kandidat për deputet nga Alternativa në kuadër të koalicionit Alternativa–Guxo me Lëvizjen Vetëvendosje për zgjedhjet e 28 dhjetorit, ka deklaruar se Kosova është shumë e vonuar në zhvillimin e turizmit.
Thaçi e sheh të domosdoshme formimin e Ministrisë së Turizmit.
Thaçi, i cili ka qenë për vite me radhë kryetar i Shoqatës së Promovimit të Turizmit Malor të Kosovës, tha në emisionin “Këndi i Debatit” se vendi ka humbur shumë kohë pa pasur një institucion të veçantë për këtë sektor.
“Kosova, është aq e vonuar sa i përket turizmit e zhvillimit, si asnjë vend në rajon. Sot, jemi në 2025 dhe Kosova tek tash në Qeverinë Kurti e nxori dikasterin e ri – Ministrinë e Turizmit. Nga takimet që kam pasur me akter të rëndësishëm, me urgjencë iu kam thënë që të formohet Ministria e Turizmit në Qeverinë e Kosovës. Ne kemi nevojë shumë edhe për Agjencinë Kombëtare të Turizmit në qoftë se duam të ecim përpara”, deklaroi ai.
Ai kritikoi departamentin që më parë funksiononte brenda MINT-it, duke thënë se nuk ka arritur rezultate konkrete.
“Për fat të keq, ne deri tash patëm vetëm një departament pran MINT me kompetenca të politikbërjes, që për mendimin tim nuk kanë bërë asgjë. Në vitin 2023 është aprovuar ligji për turizmin dhe sot jemi shumë vonë”, deklaroi ai.
Thaçi beson se pas zgjedhjeve të 28 dhjetorit dhe me mazhorancën që pret të krijohet nga koalicioni ku ai bën pjesë, sektori i turizmit do të marrë zhvillimin e duhur.
“Mendoj dhe shpresoj që me zgjedhjet që po vijnë dhe mazhorancën që do të fitojë ky grup politik, që me krijimin e Ministrisë së Turizmit do të krijohen mekanizmat pastaj dhe do të ecet dhe të jemi konkurrent. Kosova, ka 63 për qind reliev të bjeshkëve, diçka që nuk asnjë vend në rajon nuk e ka këtë natyrë”.
Ai theksoi se Kosova ka potencial të jashtëzakonshëm për turizëm malor dhe natyror, por pa struktura shtetërore funksionale, ky potencial mbetet i pashfrytëzuar.
