Edhe njëherë iu kthye ish partnerit qeverisës.
Pavarësisht që para e pas zgjedhjeve e mohoi një bashkëpunim të tillë, kryeministri në detyrë, Albin Kurti i dërgoi një ftesë për takim kryetarit të Lidhjes Demokratike të Kosovës, Lumir Abdixhikut.
Burime të televizionit bëjnë me dije që një ftesë të tillë Kurti e ka bërë vetëm për LDK-në.
Madje, Kurti i ofroi tri orare opsionale për Abdixhikun.
“Me qëllim te konstituimit te plotë të Kuvendit të Republikës se Kosovës dhe procesit të zgjedhjes se Qeverisë së re, për t’u konsultuar paraprakisht, ju ftoj në takim të mërkurën, me date 9 prill, ne orën 15:00, apo të enjten, me datë 10 prill, ne orën 9:00 ose në 14:00. Mirëpres përgjigjen tuaj për këtë takim”.
Mirëpo, Lidhja Demokratike e Kosovës ende nuk kanë vendosur se a do të pranojnë një ftesë të tillë.
Veçse, qëndrimin për Vetëvendosjen thonë se tashmë e kanë.
“Organet e partisë do të vendosin se a do të shkojmë apo jo. Përndryshe qëndrimet tona për qeverisjen me LVV-në i kemi të qarta”, tha anëtarja e kryesisë së LDK-së, Jehona Lushaku.
Optimist për një formulë të tillë të koalicionit është treguar Haxhi Avdyli i Listës Guxo, i cili është edhe deputet i zgjedhur në Kuvendin e Kosovës, nën listën e LVV-së.
“Kjo ftesë është mëse normale dhe besoj që zotëri Lumir Abdixhiku do t’i përgjigjet pozitivisht ftesës për takim. Normalisht se besoj se Kurti dhe Abdixhiku kanë shumë për çka të biseduar dhe diskutuar. Kemi të bëjmë me konstituimin e Kuvendit por edhe institucioneve të tjera. Tash a ka gatishmëri për ndonjë koalicion të mundshëm ajo mbetet për t’u diskutuar. Në bazë të deklaratave të disa akterëve të LDK-së deri tani s’ka pas ndonjë interesim për koalicion, por sidoqoftë këto takime janë të mirëseardhura dhe të mira”.
Avdyli tutje duke i konfirmuar negociatat VV-NISMA ka thënë që disponimi mes partive ka qenë i mirë.
“Ne jemi me 48 deputetë në bazë të certifikimit të rezultateve nga KQZ-ja. Me 48 deputetë dhe pakicat jo serbe nuk mund ta bëjmë qeverinë. Kjo e shtron nevojën që të kemi bashkëpunime të tjera. Ka disponim dhe vullnet edhe nga partitë të tjera, duke përfshirë edhe deputetët e partisë Nisma Socialdemokrate që t’i bashkohen qeverisë Kurti. Mendoj se Kosova se ka luksin që të humb kohë dhe të shkojë në zgjedhje të reja…Disponimi dhe atmosfera ka qenë e mirë dhe është e mirë edhe në bazë të deklarimeve të akterëve të ndryshme të Nisma-s që kanë dhënë në opinion. S’ka vend për kërkesa maksimaliste, por ka vend për një vullnet të mirë për të mos lejuar Kosovën që të shkojë në zgjedhje të reja të jashtëzakonshme”, tha ai.
Madje, ai përmend edhe deputetë nga tabori opozitar, që sipas tij në ditën e seancës konstituive të Kuvendit me 15 prill mund të kalojnë te Lëvizja Vetëvendosje.
Megjithatë, ai nuk pranon të jep emra të ndonjë prej deputetëve.
