E kjo protestë nuk kaloi edhe pa incidente. Kjo, pasi disa persona tentuan të thyejnë pikën që ndanë Kosovën me Serbinë.
E përshkallëzimi i situatës, sipas ministrit të Punëve të Brendshme, Xhelal Sveçla u bë nga grupe ruse të cilët po përpiqen të cenojnë sovranitetin e Kosovës.
“Ditët e fundit, aktorë të tjerë shtetërorë e joshtetërorë të këtyre dy vendeve, që janë të vetmet, që nga Lufta e Dyte Botërore, që ndezën luftëra në Evropë, kanë hyrë brenda territorit të Kosovës dhe ende gjenden këtu. Të armatosurit e maskuar dhe të barrikaduar në rrugë, me mbështetjen edhe të qendrës së spiunazhit rus që gjendet në Nish të Serbisë, po përpiqen që ta cenojnë sovranitetin tonë, duke nxitur provokime agresive në mënyrë që ta largojnë vëmendjen nga agresioni në Ukrainë, ku siç po shihet Putini po e humb luftën”, ka shkruar Sveçla në Facebook.
Përfshirjen e rusëve në tensionet në veri e konfirmojnë edhe njohës të sigurisë.
Për këtë, Bedri Elezi kërkon nga institucionet e sigurisë në Kosovë të kenë kujdes.
Ndërsa nga Partia Demokratike e Kosovës kërkojnë që situata në veri të shihet më seriozitet e jo përmes statuseve në facebook.
Mirëpo, sipas ministrit të Brendshëm, Policia e Kosovës është e aftë dhe i ka të gjitha kapacitetet e nevojshme që të përballet me këto struktura kriminale.
Kronika e gazetares Doresa Geci.
