Të shtunën të gjithë sytë janë nga Beogradi.
Në kryeqytetin serb, studentët kanë thirrur një protestë masive.
Që nga muaji dhjetor, studentët po kërkojnë përgjegjësi politike për shembjen e një strehe në stacionin hekurudhor të Novi Sadit, ku humbën jetën 15 qytetarë të pafajshëm.
Gazetari nga Beogradi, Nikola Kërstiq, thotë se ky moment është një pikë kthese për shoqërinë serbe.
“Këtë shtunë pritet të jetë njëra nga protestat më të fuqishme në 30 vitet e fundit në Serbi. Megjithatë është e vështirë të parashikohet se çfarë do të ndodhë dhe si do të reagojnë autoritetet shtetërore. Ka edhe nga ta që mendojnë se një revolucion është duke ndodhur dhe se po vjen fundi i regjimit të Vuçiqit. Ajo që dihet sigurt është se kemi ardhur në një pikë kthese dhe se nga këtu nuk ka më kthim mbrapa” , shprehet Kërstiq.
Por, Kërstiq paralajmëron se në rast se Vuçiq i mbijeton politikisht protestave, atëherë hakmarrja e tij ndaj protestuesve do të jetë shumë egër.
“Nëse studentet edhe aktivistët e humbin këtë betejë atëherë hakmarrja e Vuçiqit do të jetë shumë egër ndaj të gjithë atyre. Ai vetëm do ta pres momentin e duhur për ta bërë një gjë të tillë. Vuçiqi nuk po kalon nëpër periudhat më të mira por rënia e tij nga pushteti është një proces më i ndërlikuar. Megjithatë ai është shumë i vetëdijshëm se ditët e tij më të mira kanë kaluar”, thotë gazetari nga Beogradi.
Ndër kërkesat kryesore të studentëve në Serbi është publikimi i gjithë dokumentacionit për rindërtimin e stacionit hekurudhor në Novi Sad, për të përcaktuar përgjegjësinë penale dhe politike për tragjedinë.
Partia në pushtet deri më tani nuk ka qenë e gatshme për t’i plotësuar kërkesat e studentëve, ndërkaq kryeministri serb, Milosh Vuçeviq ka dhënë dorëheqje.
