Shumica e të rinjve në Gjermani nuk mund ta imagjinojnë jetën pa rrjetet sociale, ndërsa një pjesë e konsiderueshme e të rriturve do të preferonin të jetonin në një botë pa to, sipas një ankete nga Instituti për Kërkime Ekonomike IFO me seli në Mynih.
Anketa pohon se pothuajse të gjithë në Gjermani përdorin rrjetet sociale; 96 përqind e të rinjve dhe 90 përqind e të rriturve dhe se më shumë se gjysma e të rriturve, ose 58 përqind dhe 78 përqind e të rinjve kalojnë më shumë se një orë në ditë në to, ndërsa ky numër rritet më tej gjatë fundjavave.
Opinionet mbi rëndësinë e rrjeteve sociale ndryshojnë ndjeshëm. Ndërsa 47 përqind e të rriturve thonë se do të preferonin të jetonin pa to, plot 68 përqind e të rinjve pohojnë se një botë pa rrjete sociale do të ishte e paimagjinueshme.
Efektet negative shqetësojnë të dyja palët, pasi 77 përqind e të rriturve dhe 61 përqind e të rinjve besojnë se rrjetet sociale kanë një efekt të keq në shëndetin mendor të fëmijëve dhe adoleshentëve dhe rezultatet janë të ngjashme kur bëhet fjalë për shëndetin fizik.
Kur bëhet fjalë për rregullat, shumica e të rriturve, ose 85 përqind, mbështesin futjen e një moshe minimale prej 16 vjeç për hapjen e llogarive në rrjete, dhe midis të rinjve, 47 përqind e mbështesin propozimin, ndërsa 42 përqind janë kundër.
Shumica e të rriturve dhe të rinjve mbështesin ndalimin e telefonave celularë në shkollat fillore, si gjatë orëve të mësimit ashtu edhe gjatë pushimeve.
Në shkollat e mesme, mendimet janë të ndara kur bëhet fjalë për përdorimin e tyre gjatë pushimeve, por shumica është në favor të ndalimit gjatë orëve të mësimit.
Anketa përfshiu 2,982 të rritur dhe 1,033 të rinj midis moshës 14 dhe 17 vjeç, sipas faqes së internetit të IFO-së.
