Kryeministri i vendit, Albin Kurti ka zhvilluar sot një bisedë telefonike me presidentin e Turqisë, Rexhep Taip Erdogan.
Me këtë rast, Kurti ka shprehur edhe njëherë ngushëllime Erdoganit për viktimat e tërmetit, tekaa e ka falënderuar për pritjen që i kishte bërë në takimin e tre shkurtit.
“Në emër të Qeverisë së Republikës dhe popullit të Kosovës, Kryeministri Kurti i shprehu edhe njëherë ngushëllime Presidentit Erdogan, e përmes tij, familjarëve të viktimave të tërmetit dhe mbarë popullit të Turqisë. Gjithashtu ai falënderoi Presidentin Erdogan për mikpritjen zemërgjerë në Stamboll me datën 3 shkurt, ku patën një takim tejet produktiv që do të shërbejë për forcim të mëtejshëm të marrëdhënieve dhe miqësisë së përhershme në mes të dy vendeve tona. Kryeministri Kurti tha që Kosova është vend jo i madh por me zemër të madhe, që ka dëshmuar bujari ndaj të gjithëve në ditët e tyre të vështira. Së fundi edhe ndaj ukrainasve e afganëve. Kosova është dhe gjithmonë do të vazhdojë të qëndrojë pranë shteteve mike në ditët e tyre të vështira, posaçërisht Turqisë”, thuhet në njoftim.
Tutje theksohet se Erdogani ka falënderuar Kurtin për solidarizimin me shtetin dhe popullin e Turqisë, e po ashtu edhe ekipin e kërkim-shpëtimit të FSK-së që kontribuan për gjetjen e të gjallëve.
Në këtë takim gjithashtu u bisedua edhe për takimin e fundit në Bruksel për normalizimin e marrëdhënieve ndërmjet Kosovës dhe Serbisë, teksa presidenti Erdogan u shpreh i lumtur me arritjen e marrëveshjes. /Teve1.info/
