Policia e Kosovës ka arrestuar edhe një person në kuadër të hetimeve për rastin e narkotikëve në Prishtinë, ku më herët ishin arrestuar disa persona, përfshirë edhe një ish-ministër.
Sipas raportit 24-orësh të Policisë, i dyshuari, shtetas i Kosovës, është arrestuar më 17 nëntor, pas hetimeve lidhur me rastin e 14 nëntorit 2026.
Gjatë veprimeve hetimore, Policia ka sekuestruar edhe tri vetura, ndërsa i dyshuari është intervistuar dhe, në konsultim me prokurorin, është dërguar në mbajtje.
“I dyshuari, pas intervistimit, në konsultim me prokurorin është dërguar në mbajtje”, thuhet në raportin policor.
Rasti lidhet me operacionin policor të koduar “Heshtja”, i cili ishte realizuar më 14 nëntor në rajonin e Prishtinës, në kuadër të hetimeve për veprat penale që ndërlidhen me narkotikët.
Ndërkohë, Gjykata Themelore në Prishtinë më herët kishte caktuar nga një muaj paraburgim për gjashtë të dyshuar, mes tyre edhe një ish-ministër.
Me arrestimin e fundit, hetimet për këtë rast po vazhdojnë, ndërsa Policia nuk ka bërë të ditur identitetin e personit të arrestuar.







