Shefi i Grupit Parlamentar të AAK-së, Besnik Tahiri, ka thënë se kryeministri Albin Kurti e ka reduktuar sovranitetin e Kosovës në një konflikt sipas tij të hapur ndërmjet Kosovës dhe vendeve që kanë qenë krah Kosovës, raporton teve1.info
Gjatë fjalimit të tij në Kuvendin e Kosovës, Tahiri tha se anashkalimi i strategjisë kombëtare i sigurisë ku thuhet se sovraniteti mbrohet me partnerët ndërkombëtarë e ka dobësuar Kosovën në rrafshin e brendshëm dhe të jashtëm.
“Ashtu siç e ka pasur kryeministri e ka edhe tash mbështetjen për vendosjen e sovranitetit, por nuk e ka mbështetjen tonë dhe nuk do ta ketë nëse këtë pjesë të rëndësishme të subjektivitetit tonë shtetëror e ka reduktuar në një konflikt të hapur ndërmjet Kosovës dhe vendeve që kanë qenë në krah tonin në forcimin e shtetësisë sonë. I nderuar kryeministër, për ne qasja që ju e keni marrë është jo vetëm një verbëri politike është edhe e rrezikshme në ecjen tutje të vendit tonë”, tha Tahiri.
Ai foli edhe për mocionin e mosbesimit ndaj qeverisë që AAK e ka iniciuar.
“Ne kemi kërkuar mocionin dhe qëndrojmë pas tij sepse besojmë që dalja nga ky eksperiment e ndihmon drejtimin shtetëror të Kosovës. Reflektimi ynë sot është mbrojtje e amanetit të atyre që e dhanë jetën”, ka thënë Tahiri.