Shefi i Grupit Parlamentar të PDK-së, Abelard Tahiri tha se Kuvendi nuk e meriton që të shpenzojë më taksat e qytetarëve as edhe një ditë të vetme, pasi sipas tij, është jonfunksional.
Gjithashtu ai kërkoi shpërbërjen e Kuvendit, teksa shtoi se është koha që vendi të shkojë në zgjedhje të parakohshme, përcjell teve1.info
“Si Grup Parlamentar i PDK-së dhe si PDK, tashmë kemi një vendim, ku ne kërkojmë që ky Kuvend jofunksional, i cili më shumë po i shkakton dëme kësaj Republike sesa që po ndihmon në një qeverisje të mirë, duhet të shpërbëhet sa më parë. I kemi dhënë mundësinë edhe kryeministrit, nga java e kaluar, ose ta shpërbëjë Kuvendin, ose të jap dorëheqje, dhe koha është që vendin tonë, Republika e Kosovës, të shkojë në zgjedhje të parakohshme”, tha ai para mediave.
Deputeti Tahiri theksoi se më s’do t’i votojnë marrëveshjet ndërkombëtare e as projektligjet në Kuvend, “me qëllimin e vetëm që sa më shpejt” vendi të shkojë në zgjedhje.
Tahiri u deklarua për media pas dështimit të mbledhjes së sotme të kryesisë së Kuvendit. /Teve1.info/
