Shefi i Grupit Parlamentar të PDK-së, Abelard Tahiri, ka thënë se faturat e larta të energjisë elektrike që kanë ardhur për muajin dhjetor, janë goditja e radhës e kësaj qeverie për qytetarët.
Ai ka thënë se në kohën e inflacionit edhe pa çmimin e lartë të faturave të energjisë elektrike, familjet kosovare me vështirësi po e mbyllin muajin.
“Në vitin e tretë të Qeverisë Kurti, qytetarët po ndjejnë në xhep efektet “e fuqishme” të kësaj qeverie. Faturat e larta të energjisë janë goditja e radhës për familjet kosovare. Në këtë kohë inflacioni e varfërie, duhet të mendojmë për policët, mësuesit, të gjithë punëtorët e sektorit publik dhe posaçërisht për ata të sektorit privat, të cilët, edhe pa këto fatura, me shumë vështirësi e mbyllnin muajin. Kosova meriton më mirë”, ka shkruar Tahiri në Facebook.
Shumë qytetarë janë ankuar se për muajin dhjetor faturat e energjisë elektrike u kanë ardhur shumë më shtrenjtë se për muajin e kaluar./teve1.info/
