Ka afër katër vite që kryeprokurori i shtetit udhëhiqet me ushtrues detyre.
Por jo vetëm kjo pozitë ka mbetur pa udhëheqës.
Me ushtrues të detyrës është edhe Këshilli Gjyqësor i Kosovës.
Njëjtë funksionon edhe zyra e Avokatit të Popullit.
Së fundmi edhe pozita e presidentit të shtetit është duke u udhëhequr nga ushtruesja e detyrës së presidentit, Albulena Haxhiut.
E gjithë kjo po kritikohet nga juristët.
“Është një dështim, realisht një dështim i institucioneve të shtetit në këtë rast nëse flasim për kryeprokurorin e shtetit, faji është tek presidentja, Vjosa Osmani, e cila për vite me radhë e ka mbajtur në tavolinë emrin e kandidatit për kryeprokuror të shtetit”, thotw Anton Nrecaj -jurist.
Funksionimi i institucioneve kyçe të shtetit me përfaqësues të përkohshëm, sipas Anton Nrecaj ka pasoja për shtetin.
“E dëmton jashtëzakonisht tepër funksionimin e demokracisë në vend dhe pengon ecurinë e hapave drejt integrimit në BE”, shprehet ai.
Një gjë e tillë, sipas avokatit, Ardian Bajraktari kjo duhet të ndodhë vetëm në rrethana emergjente.
“Funksionimi me ushtruese detyre edhe mund të konvenojë dikujt pasi janë me të cenueshme pozitat dhe rrjedhimisht mund të përdoren edhe për involvim të aspektit politik. Mirëpo është mirë që ky trend dhe kjo qasje të ndryshojë sa më parë sepse është e rëndësishme që institucionet vitale aq me tepër kur kemi të tilla, të kompletohen dhe ta ushtrojnë detyrën dhe përgjegjësinë. Kemi një numër të agjencive të pavarura të cilat ose janë në përfundim të mandatit të tyre apo ka edhe të tilla që janë jo funksionale si për shembull KPM”, thotë avokati Ardian Bajraktari.
Që nga viti 2024, me të emëruar përkohësisht është edhe pozita e kryeshefit ekzekutiv të Korporatës Energjetike të Kosovës, kjo pas arrestimit të ish kryeshefit Nagip Krasniqi.
