Deputeti i Partisë Demokratike të Kosovës, Abelard Tahiri, deklaroi se kryeshefi i KEK-ut, Nagip Krasniqi, ka pasur siguri të fuqishme nga kryeministri, Albin Kurti, për të bërë abuzime në vazhdimësi në Koorporatën Energjetike të Kosovës.
Krasniqi u arrestua dje nga Policia e Kosovës për keqpërdorim të punës zyrtare, me ç’rast Tahiri njoftoi se ditëve në vijim ky i fundit do të akuzohet për një seri shkeljesh që i ka bërë si drejtues i kësaj korporate.
“Ne e kemi parë një tendencë të vazhduar të Qeverisë Kurti për ta mbrojtur drejtorin e KEK-ut, Nagip Krasniqin. Në fakt, në kuadër të komisionit dhe intervistimit që e kemi pasur me Krasniqin, ne e kemi parë në vazhdimësi fuqinë e tij politike. Krasniqit nuk i bënte përshtypje fare as Zyra e Rregullatorit të Energjisë, as ministrja e energjisë, as nuk i bënin përshtypje fare debatet parlamentare, sepse kishte një lidhje direkte me kryeministrin Kurti dhe ndjente një siguri të fuqishme pikërisht në abuzimet që i bënte në vazhdimësi. Sot, po iu paralajmëroj që në ditët në vijim do të procedojmë më tutje denoncimet pikërisht për kryeshefin në fjalë i cili është arrestuar dje dhe i njëjti do të akuzohet për një seri shkeljesh që i ka bërë si drejtues i kësaj korporate”, deklaroi Tahiri gjatë seancës plenare në Kuvend.
Megjithatë, Tahiri konsideroi se Krasniqi është vetëm një vegël e ambasadorit, Martin Berishaj dhe kryeministrit, Albin Kurti.
“Tani është shkëputur nga ky zinxhir dhe besoj që do të jetë më e pamundur që të lidhet dhe të vazhdojë ky abuzim”, potencoi tutje Tahiri.
Dje, Policia e Kosovës me urdhër të Prokurorisë ka arrestuar drejtorin e KEK-ut, Nagip Krasniqi, i cili dyshohet për keqpërdorim të punës zyrtare.
Andaj, ky i fundit është dërguar në mbajtje për 48 orë./teve1.info/.
