E ka treguar vazhdimisht se nuk heq dorë nga të preferuarit e tij.
Trajneri i Shqipërisë, Silvinjo, është një nga konservatorët e profesionit, e dihet se të tillë si Asllani, Bajrami, Shehu, Ajeti e Manaj janë lojtarët më të besuar të tij, si dikur Asani, pa harruar Hysajn e Mitajn.
Gjithsesi, në prag të duelit përcaktuese në plej-ofin e Botërorit, tekniku brazilian e sheh veten në vështirësi më të mëdha për të zgjedhur formacionin.
Jo vetëm sepse ka mungesa si ato të Manajt, Dakut e Berishës, por sidomos sepse në ekip sot ka 26 lojtarë që konkurrojnë fort për 11 vende në fushë.
Forma e jashtëzakonshme e Ernest Muçit në Turqi ka bërë që Silvinjo ta konsiderojë më seriozisht atë që e ka pasur zëvendësues luksi.
Edhe më problem është shpërthimi i Anis Mehmetit, i cili mund të thuhet se e ka siguruar me dhunë vendin në kombëtare.
Me formën e shkëlqyer në Angli, ai e meriton të luajë që nga minuta e parë, por me gati 3 vjet mungesë te kuqezinjtë, nuk është e lehtë për trajnerin që ta hedhë në fushë si titullar.
Ndoshta, do të vendoset në momentin e fundit, me Muçin që ka më shumë shanse, por edhe me Mehmetin që nuk mund të anashkalohet.
Braziliani ka të sigurt portën, mbrojtjen e mesfushën, pasi lojtarë si Gjimshiti, Hysaj, Mitaj, Ajeti, Shehu, Asllani e Laçi nuk lënë vend për dyshim.
Duhet parë nëse Bajrami do të jetë në repartin e sulmit, apo aty do të luajnë Broja e Uzuni, shkruan ‘abcnews’.
Silvinjo nuk ka probleme me lojtarët që ka grumbulluar, të gjithë janë në formë të mirë, ndonëse Broja ka luajtur pak ndërsa Ramadani, Uzuni e Gripshi kanë ardhur me vonesë.
Vlen të theksohet se tekniku pati minuta të tëra duke i vendosur lojtarët për të provuar penalltitë, pasi ndeshja ndaj Polonisë në Varshavë mund të vendoset edhe nga 11-metërshat.
