Të premtën u detyruan të paraqiten para Gjykatës.
Këtë mëngjes, Salih Zyba, Fitore Pacolli e Drita Millaku nuk munguan në seancë, pas vendimit të Gjykatës Themelore në Prishtinë që të silleshin me detyrim.
Mirëpo, këtë nuk e respektoi ministri në detyrë i Punëve të Brendshme, Xhelal Sveçla.
Të gjithë këta po akuzohen për hedhjen e gazit lotsjelles në Kuvendin e Kosovës në mars të 2018.
Mirëpo në mungesë të Sveçlës, kjo seancë dështoi.
Kësisoj, seanca u shtye për 16 janar të vitit 2026.
E nëse atëherë sërish mungon njëri nga palët, ndaj tij do të lëshohet urdhërarrest.
“Seanca do të vazhdojë për secilën palë që është prezente, ndërkohë secila palë që mungon, ndaj asaj pale do të lëshohet urdhërarrest dhe kërkesë për caktim të masës së paraburgimit, duke vazhduar seancën me palën prezente”, tha gjyqtari, Sabit Sadikaj.
E se pse mungoi Sveçla, tregoi avokati i tij.
“Sipas informatave që kom, ministri është në udhëtim zyrtar….Kaq kom me deklaru ma shumë nuk di”.
Seanca e fundit e 16 shtatorit për Sveçlën, Zybën e Pacollin kishte dështuar, pasi këta të fundit nuk kishin ardhur.
Andaj Gjykata kishte lëshuar urdhëresë për sjelljen me detyrim ndaj tyre.
Kronikë e realizuar nga gazetarja Adea Mustafaj.
