Ministri i Brendshëm, Xhelal Sveçla ka thënë se pjesëmarrësit në krimet e kryera gjatë luftës në Kosovë duhet të mbahen përgjegjës.
Ai këtë deklaratë e beri pas arrestimit të sotëm të një personi në Graçanicë i cili dyshohet për pjesëmarrje në krimet gjatë luftës në Kosovë.
“Në cilësinë e gardianit të burgut në Prishtinë dhe në paralelen e ndarë nga Prishtina konkretisht në burgun e Lipjanit, gjatë asaj periudhe, në mënyrë sistematike, dyshohet se ka ushtruar torturë e dhunë çnjerëzore ndaj të burgosurve shqiptarë, në bashkëpunim dhe me persona të tjerë. Gjatë kontrolleve të zhvilluara dhe bastisjes në banesën e të dyshuarit ditën e sotme, janë gjetur dhe konfiskuar armë ilegale në posedim të personit”, ka shkruajtur ai.
Teksa ka përgëzuar Policinë e Kosovës për punën e zhvilluar gjatë hetimeve si dhe për arrestimin.
“Sado që vitet kalojnë, keqtrajtimet dhe torturat e atyre viteve nuk mund të kalojnë pa u ndëshkuar. Përgjegjësit duhet të vihen para drejtësisë”, ka thënë tutje Sveçla.
Ndryshe Policia e Kosovës ka arrestuar një serb në Graçanicë që dyshohet për krime lufte në Kosovë.
Sipas njoftimit, i arrestuari, i identifikuar me iniciale D.M, dyshohet për veprën penale “krime lufte kundër popullsisë civile.
Ai dyshohet se gjatë luftës në Kosovë, si gardian në burgun e Lipjanit “në mënyrë sistematike, ka ushtruar torturë, dhunë fizike, psikike, keqtrajtime dhe maltretime çnjerëzore dhe të skajshme për jetën ndaj të burgosurve shqiptarë”.
Kurse pas këtij arrestimi, serbët lokalë u mblodhën para stacionit policor në Graçanicë – komunë e banuar me shumicës serbe që gjendet afër Prishtinës – dhe për një kohë të shkurtër bllokuan rrugën kryesore Prishtinë-Gjilan që kalon nëpër këtë komunë./teve1.info./
Arrestohet një serb i dyshuar për krime lufte, i sekuestrohen armë e dokumente
