Ministri në detyrë i Punëve të Brendshme, Xhelal Sveçla, ka reaguar lidhur me debatet e fundit për Ligjin për Shtetësinë e Republikës së Kosovës, duke theksuar se dispozitat që kanë nxitur polemika nuk janë të reja dhe nuk janë futur nga qeveria aktuale.
Në një konferencë për media të mbajtur të martën, ai tha se neni 31 i Ligjit për Shtetësinë së vitit 2026 mbështetet në bazën kushtetuese të vendit dhe rrjedh nga Pakoja e Ahtisaarit.
Sipas tij, kjo dispozitë është pjesë e rendit kushtetues të Kosovës që nga viti 2008 dhe përputhet me nenin 155 të Kushtetutës.
Sveçla theksoi se kritikat e opozitës ndaj kësaj dispozite janë të pabazuara, pasi ajo është bërë pjesë e përhershme e Kushtetutës përmes ndryshimeve kushtetuese të vitit 2012.
“Ditëve të fundit janë bërë deklarime të shumta lidhur me Ligjin për Shtetësinë e Republikës së Kosovës. Për shkak të interesimit publik, është e rëndësishme të sqarohen disa fakte themelore, posaçërisht lidhur me nenin 31 të këtij ligji. Së pari, neni 31 i Ligjit për Shtetësinë e vitit 2026 nuk është një dispozitë e re. Ky nen është pjesë e dispozitave themelore kushtetuese të Republikës së Kosovës, përkatësisht nenin 155 që derivon nga Pakoja e Ahtisaarit. Kjo e drejtë nuk është krijuar apo njohur nga kjo qeveri dhe nuk është futur për herë të parë me ligjin e ri, ashtu siç eksponentët e opozitës po e proklamojnë”, tha ai./teve1.info/
