Gjykata Supreme e Kosovës ka refuzuar si të pabazuar ankesën e Lëvizjes Vetëvendosje kundër vendimit të Paneli Zgjedhor për Ankesa dhe Parashtresa lidhur me mbajtjen e një tubimi politik në Sheshin “Skënderbeu” në Prishtinë.
Sipas aktgjykimit të Kolegjit të Gjykatës Supreme, ankesa e LVV-së ndaj vendimit të PZAP-së, ZP.Anr.7/2026 të datës 22 maj 2026, është vlerësuar e pabazuar, ndërsa vendimi i këtij institucioni është lënë në fuqi.
Rasti kishte të bënte me refuzimin e kërkesës së LVV-së për organizimin e një tubimi politik në Sheshin “Skënderbeu”, në kuadër të fushatës për Zgjedhjet e Parakohshme për Kuvendin e Republikës së Kosovës, të planifikuara të mbahen më 7 qershor 2026.
Në ankesën e dorëzuar në Gjykatën Supreme, LVV kishte pretenduar se PZAP kishte zbatuar gabimisht nenin 4 të Rregullores Zgjedhore Nr. 07/2024 dhe se vendimi ishte i mangët në arsyetim. Sipas LVV-së, kërkesa e Partia Demokratike e Kosovës e paraqitur më 30 prill 2026 nuk mund të krijonte përparësi procedurale, pasi në atë kohë Komisioni Komunal i Zgjedhjeve në Prishtinë ende nuk ishte funksionalizuar.
Megjithatë, Gjykata Supreme ka konstatuar se KKZ-ja në Prishtinë kishte vepruar në përputhje me nenin 4 të Rregullores Nr. 07/2024, e cila parasheh se kërkesa e një subjekti politik mund të refuzohet nëse hapësira e kërkuar është rezervuar më parë nga një subjekt tjetër politik.
Nga dokumentacioni i shqyrtuar rezulton se PDK kishte dorëzuar kërkesën për mbajtjen e tubimit në Sheshin “Skënderbeu” më 30 prill 2026, ndërsa LVV kishte paraqitur kërkesën më 8 maj 2026 për të njëjtën datë dhe lokacion.
Gjykata ka vlerësuar gjithashtu se Rregullorja Nr. 07/2024 përcakton vetëm afatin e fundit për paraqitjen e njoftimeve për tubime politike dhe nuk ndalon paraqitjen e kërkesave para funksionalizimit të KKZ-së.
Po ashtu, Supremja ka hedhur poshtë pretendimet e LVV-së për mungesë arsyetimi në vendimin e PZAP-së, duke konstatuar se ky institucion kishte dhënë sqarime të mjaftueshme juridike lidhur me çështjen.
Në përfundim, Gjykata Supreme ka vlerësuar se nuk ka pasur shkelje procedurale apo zbatim të gabuar të ligjit dhe se pretendimet ankimore të LVV-së nuk janë mbështetur me prova relevante./teve1.info/
