Sipas një studimi të ri shkencor burrat kanë nevojë të ushtrohen pothuajse dy herë më gjatë se gratë për të arritur të njëjtën ulje të rrezikut të sëmundjeve koronare të zemrës.
Studimi analizoi të dhënat e aktivitetit fizik nga më shumë se 80,000 njerëz dhe zbuloi se rreziku i sëmundjeve të zemrës u ul me 30 përqind tek gratë që ushtroheshin për 250 minuta në javë.
Burrat duhej të ushtroheshin 530 minuta në javë, gati nëntë orë, për të parë të njëjtin efekt.
Studimi mbështetet në hulumtimet e mëparshme që sugjerojnë se gratë përfitojnë më shumë se burrat nga e njëjta sasi ushtrimesh, por në përgjithësi janë më pak aktive fizikisht dhe kanë më pak gjasa të arrijnë objektivat e rekomanduara të ushtrimeve.
Sipas Shërbimit Kombëtar Shëndetësor Britanik, burrat dhe gratë e moshës 16 deri në 64 vjeç duhet të bëjnë të paktën 150 minuta ushtrime të moderuara ose 75 minuta ushtrime të fuqishme në javë, të kombinuara me aktivitete për forcimin e muskujve dy herë në javë.
Dr. Jiajin Chen i Universitetit Xiamen në Kinë dhe kolegët e tij analizuan të dhënat nga aparatet e monitorimit të aktivitetit të mbajtura nga vullnetarë të moshës së mesme që morën pjesë në projektin UK Biobank.
Nga 80,243 pjesëmarrës pa histori të sëmundjeve koronare të zemrës, gratë që përmbushën objektivin e ushtrimeve javore prej 150 minutash kishin një rrezik 22 për qind më të ulët për të zhvilluar sëmundje të zemrës gjatë tetë viteve të ndjekjes, krahasuar me ato që nuk ushtroheshin mjaftueshëm.
Për burrat, rreziku ishte 17 për qind më i ulët.
Analiza të mëtejshme treguan se rritja e kohëzgjatjes së ushtrimeve në 250 minuta në javë çoi në një ulje të rrezikut prej 30% për gratë, një shifër që burrat e arritën vetëm kur ushtrimet tejkaluan 530 minuta në javë.
Rezultati më i habitshëm erdhi nga të dhënat e më shumë se 5,000 burrave dhe grave që kishin tashmë sëmundje koronare të zemrës.
Këtu, studiuesit zbuluan se rreziku i vdekjes gjatë periudhës së ndjekjes ishte tre herë më i ulët për gratë që përmbushën objektivin e tyre javor të ushtrimeve krahasuar me burrat që kishin aktivitet fizik të ngjashëm.
