Kryeministri në detyrë, njëherësh kryetari i Vetëvendosjes, Albin Kurti ka ftuar kryetarin e LDK-së, Lumir Abdixhikun, dhe atë të PDK-së, Memli Krasniqin për një takim konsultativ më 1 maj me qëllim të konstituimit të Kuvendit të ri.
Lidhur me këtë, deputetja e Lëvizjes Vetëvendosje, Jeta Statovci, në emisionin “Info Nata” në Tëvë1 ka thënë se ftesa është bërë për të filluar zhbllokimin e situatës aktuale politike të vendit.
Statovci është shprehur se ftesa po ashtu është bërë me synimin e një dakordimi për funksionalizimin e institucioneve.
Sipas saj letra iu është dërguar PDK-së dhe LDK-së si dy prej tri partive që iu takojnë kryetarët dhe nënkryetarët.
“Po edhe nga letra e kryeministrit Kurti deleguar partive tjera konform dispozitave ligjore të cilat parashohin përbërjen e kryesisë së Kuvendit të Kosovës me kryetarët dhe nënkryetarët në kuadër të hapave të cilët duhet marrë drejt procesit të zhbllokimit karshi proceseve në kuadër të formimit të institucioneve është marrë edhe ky hap i dërgimit të ftesave për takime eventuale konsultative në sensin e një dakordance në mënyrë që të bëhen hapa konform pra funksionalizimit të institucioneve gjë që ne si deputetë dhe përfaqësues të popullit e kemi përgjegjësi bazë dhe në sensin që të mos mbetemi pjesë në proces të barrikadave dhe bllokimeve pra është bërë një hap në sensin e një takimi konsultativ së bashku me dy partitë tjera konform tri partive që iu takojnë kryetarët dhe nënkryetarët pra mbi atë bazë janë dërguar edhe ftesat”, ka deklaruar ajo.
Sa i përket përgjigjes pozitive të kryetarit të PDK-së, Memli Krasniqi ndaj ftesës së Kurtit, ajo ka thënë se është në kuptimin që politika në thelbin e saj ka të bëj me çështjen e vizionit politik edhe strategjik për vendin.
“Ne pamë që nga ana e Partisë Demokratike të Kosovës ka një konfirmim të pjesëmarrjes në kuptimin që politika në thelbin e saj ka të bëj me cështjen e vizionit politik edhe strategjik për vendin gjithashtu edhe me përgjegjësitë të cilat i kemi karshi qytetarëve”, ka shtuar ajo.
Kjo ftesë e Lëvizjes Vetëvendosje ka ardhur pas shtatë përpjekjeve të pasuksesshme nga ana e tyre për ta zgjedhur Albulena Haxhiun kryeparlamentare pasi nuk i ka siguruar votat e nevojshme në Kuvend.
Ftesën e Kurtit e ka refuzuar kryetari i Lidhjes Demokratike të Kosovës, Lumir Abdixhiku i cili në përgjigjen e tij ndër të tjera ka përmendur gjuhën e përdorur para, gjatë dhe pas fushatës ndaj LDK-së.
Ndërkaq, pozitivisht ftesës së Kurtit i është përgjigjur kryetari i Partisë Demokratike të Kosovës, Memli Krasniqi siç ka thënë ai ‘ duke besuar thellësisht se Republika e Kosovës ka nevojë urgjente për zhbllokim institucional dhe për rikthimin e funksionimit të rregullt të institucionit më të lartë legjislativ, si dhe për t’i hapur rrugë afateve kushtetuese për themelimin e Qeverisë’.
Takimin e përbashkët Kurti e ka ftuar për të enjten, në orën 8:30, pak para mbajtjes së vazhdimit të radhës së seancës konstituive./teve1.info/
