Presidenti i Serbisë, Aleksandar Vuçiq, po sinjalizon gjithnjë e më qartë një orientim të fortë drejt thellimit të marrëdhënieve politike dhe ekonomike me Kinën, në një kohë kur Beogradi ndodhet nën presion të shumëfishtë politik dhe diplomatik.
Vuçiq u takua sot në mëngjes me ambasadorin e Republikës Popullore të Kinës në Beograd, Li Ming, me të cilin diskutoi zhvillimet e fundit në rajon dhe bashkëpunimin mes dy vendeve.
Gjatë takimit, presidenti serb e informoi ambasadorin kinez për, siç i cilësoi ai, “ngjarjet shqetësuese” në Kosovë dhe e falënderoi Pekinin për qëndrimin e tij në mbështetje të integritetit territorial të Serbisë.
“E falënderova edhe një herë Kinën për qëndrimin e saj të vendosur dhe parimor në lidhje me ruajtjen e integritetit territorial të Serbisë”, deklaroi Vuçiq, citoi gazeta Danas.
Presidenti serb i kërkoi gjithashtu ambasadorit Li Ming që t’i përcillte përshëndetjet e tij presidentit kinez Xi Jinping.
Vuçiq vlerësoi veçanërisht angazhimin personal të liderit kinez në forcimin e marrëdhënieve mes dy vendeve, duke e përshkruar këtë partneritet si një faktor që u jep “forcë të veçantë” raporteve serbo-kineze.
Në fokus të bisedimeve ishin edhe projektet e përbashkëta dhe mundësitë për iniciativa të reja.
Takimi me ambasadorin kinez zhvillohet në një moment delikat për politikën e jashtme dhe atë të brendshme të Serbisë.
Serbia vazhdon ta ruajë partneritetin tradicional me Rusinë, por njëkohësisht po thellon lidhjet me Pekinin në ekonomi, infrastrukturë dhe diplomaci.
Në praktikë, Beogradi duket se po përpiqet të ruajë hapësirën e tij manovruese ndërmjet fuqive të mëdha, duke i dhënë Kinës një rol gjithnjë e më të rëndësishëm.
Kjo qasje mund të shihet si një largim gradual, të paktën në planin politik dhe simbolik, nga varësia tradicionale ndaj Moskës dhe si një përpjekje për ta bërë Pekinin partnerin kryesor strategjik jashtë Evropës.
Për Vuçiqin, Kina ofron jo vetëm mbështetje diplomatike për çështjen e Kosovës, por edhe investime, kompani dhe projekte konkrete që lidhen me zhvillimin ekonomik të Serbisë.
