Struktura e Posaçme Kundër Korrupsionit dhe Krimit të Organizuar (SPAK) ka bërë të ditur se ka administruar gjithsej 156 materiale kallëzuese në lidhje me krimet zgjedhore.
Sipas njoftimit nga këto materiale 39 kanë kaluar në fazën e hetimit dhe janë regjistruar si procedime penale, 25 raste janë mbyllur me vendime për mosfillim të hetimit penal, 24 janë deleguar për kompetencë në prokuroritë e rretheve gjyqësore, 17 janë dërguar për verifikim në Drejtorinë Vendore të Policisë për informacione shtesë apo veprime të mëtejshme, 1 material është bashkuar me një çështje tjetër ekzistuese. Pjesa e mbetur ndodhet ende në proces verifikimi.
Në njoftim thuhet se 21 procedime penale nga 39 janë inicuar nga referime të Policisë së Shtetit, 1 nga Shërbimi i Kontrollit të Brendshëm të Burgjeve, 8 janë nisur kryesisht nga vetë SPAK, 3 kanë ardhur nga kallëzime të qytetarëve, 3 nga Prokuroritë e Rretheve Gjyqësore, ndërsa 3 të tjera janë bazuar në kallëzime të subjekteve politike.
“Veprat penale të evidentuara në 39 procedimet: 33 procedime për korrupsion aktiv në zgjedhje, sipas nenit 328 të Kodit Penal, 4 procedime për korrupsion aktiv dhe pasiv në zgjedhje (neni 328 dhe 328/b), 1 procedim për përdorim të funksionit publik për qëllime politike (neni 328/a), 1 tjetër për përdorim të funksionit publik për qëllime politike dhe shpërdorim detyre (nenet 328/a dhe 248)”, thuhet në njoftim.
