Të martën (sot), do të mbahet edhe një seancë për konstituimin e Kuvendit.
Kjo do të jetë hera e 22-të, pasi 21 seanca të kaluara kanë dështuar, që nga e para më 15 prill.
Seanca është paraparë të nis nga ora 11:00.
Pavarësisht se partitë politike nuk kanë lëvizur nga qëndrimet, deputeti nga Lista e Vetëvendosjes, Haxhi Avdyli ka thënë se konstituimi i Kuvendit mund të bëhet gjatë javës.
Në rend dite është zgjedhja e kryetarit të Kuvendit. E propozuara e LVV-së për kryeparlamentare, Albulena Haxhiu në disa seanca nuk ka arritur të marrë votat e mjaftueshme.
Kryesuesi i seancës, Avni Dehari në seancat e fundit ka propozuar votim të fshehtë për zgjedhjen e kryetarit të Kuvendit.
Por, formimi i komisionit ad hoc nuk po merr votat e mjaftueshme, opozita këtë propozim po e vlerëson si shkelje të rregullores.
Nga LVV këtë propozim e kanë arsyetuar me faktin se në këtë mënyrë votimi Haxhiu do të votohej edhe nga deputetë të opozitës.
Partia fituese e zgjedhjeve të 9 shkurtit ka thënë se nuk e ndërron të propozuarën e tyre për kryeparlamnetare ndonëse një gjë të tillë po e kërkon PDK e AAK.
