Sot, do të zhvillohet xhiroja e tretë e Ligës së Parë të Kosovës në futboll.
Në kuadër të kësaj xhiroje, do të luhen nëntë ndeshje, të cilat do të startojnë prej orës 16:30.
Megjithatë, në këtë xhiro, do të veçohet ndeshja ndërmjet rivalëve të qytetit të Mitrovicës, Trepçës dhe Trepçës ’89.
Në fakt, kjo përballje vlerësohet edhe derbi i kësaj xhiroje pasi të dyja skuadrat synojnë rikthimin në elitën e futbollit kosovar për sezonin e ardhshëm.
Trepça e udhëhequr nga trajneri Emin Baliqi i ka fituar dy ndeshjet e para të sezonit dhe me gjashtë pikë të mbledhura është para Trepçës ’89 së Gani Sejdiut, e cila ka një barazim dhe një fitore duke numëruar katër pikë.
Duel tjetër interesant i kësaj xhiroje është edhe ai ndërmjet Suharekës dhe skuadrës së Vushtrrisë.
Ndeshjet tjera të ditës së sotme janë: Vëllaznimi – Istogu, Besa – 2 Korriku, Kika – Feronikeli ’74, Dinamo – KEK-u, Rilindja – Vjosa, Liria – Tefik Çanga dhe Ramiz Sadiku – Prizreni.
Rangu i dytë i futbollit në Kosovë ka tërhequr vëmendjen e adhuruesëve të futbollit, duke pasur parasysh se prej fillimit gara për titullin e kampionit dhe ngjitje në Superligë po duket të jetë interesante.
