Në një prononcim për “Info Nata” në Tëvë 1, Smajlaj thotë se tejkalimi i procedurave për anëtarësim në BE nënkupton se duhet lënë anash “procedurat burokratike”, që i kanë kushtuar Ukrainës por edhe shteteve tjera në Ballkanin Perëndimor.
“Tejkalimi i procedurave nënkupton që BE duhet të përshpejtojë procedurat, t’i lë anash burokracinë brenda vetvetes që e ka vonuar këtë proces dhe tani ky rrezik që u shfaq haptaz në Evropë, kërcënon edhe Evropën Juglindore dhe Ballkanin Perëndimor dhe besoj që kjo është arsyeja e kësaj vizite kur kemi të njëjtën kohë sekretarin e SHBA-së që është afër kufirit ku janë duke ndodhur ngjarjet ndërsa ministrja e Punëve të Jashtme të Gjermanisë viziton Kosovën”, tha ndër tjerash ai.
Teksa flet për anëtarësimin e Kosovës në BE dhe NATO, politologu thotë se pavarësisht se ka ngecje në disa çështje, kjo nuk është marrë seriozisht nga BE-ja.
Sipas tij, nëse nuk integrohen shtetet e Ballkanit Perëndimor brenda BE-së, atëherë kjo mund të jetë humbje për ta por edhe për NATO-n.
‘’E dijmë që kemi ngecje në përmbushje të disa obligimeve me çështjen e shtetësisë për pesë shtetet anëtare të BE-së dhe NATO që nuk na njohin që mund ta vështirësojnë procesin e anëtarësimit mirëpo në anën tjetër ky proces ka qenë i varur nga BE kur shtetet herë herë nuk e kanë marrë seriozisht këtë çështje, kanë parë shumë interesa nacionale dhe besoj që ky rrezik që tani u shfaq haptaz që ka qenë potencial vazhdimisht do ti shtyjë shtetet anëtare që të mendojnë seriozisht dhe të gjejnë mënyra për ta integruar tërë Ballkanin Perëndimor brenda vetes sepse një ndikim ose rritje e ndikimit rus në rajon është humbje edhe për BE-në edhe për NATO-n”, shtoi Smajlaj./teve1.info/
