Një klub basketbolli në Serbi, po merr vëmendje e reagime, jo për rezultate, pasi garon në ligën e dytë, por për dizajnin e fanellave.
Një detaj i veçantë në fanella, ka shkaktuar reagime të ashpra në Kosovë.
Ngjarjet sportive në Serbi shpeshherë shndërrohen edhe në tubime politike, dhe kjo bëhet veçanërisht e dukshme kur fillojnë brohoritjet si “Kosova – Serbi”.
Në Serbi ende nuk e kanë përtypur humbjen e Kosovës dhe faktin që ajo shpalli pavarësinë në vitin 2008.
Klubi Kollubara nga Llazarevci në fanellat për këtë sezon, e kanë përfshirë hartën e Kosovës në fanellë, por të mbuluar me ngjyrat e flamurit serb. Ajo që ka shkaktuar edhe më shumë zemërim ishte mesazhi i publikuar nga klubi serb në rrjetet sociale:
“Asnjëherë nuk është e humbur ajo që është e shenjtë. Rritu me shpresë, o lule e kuqe.”
Ky veprim natyrisht ka shkaktuar admirim në publikun serb, ndërsa në Kosovë dhe më gjerë ka hasur në kundërshtime të ashpra.
Në të vërtetë, bëhet fjalë për një klub që garon në Ligën e Dytë të Meshkujve në Serbi, dhe disa vite më parë ata e arritën suksesin më të madh me ngjitjen në rangun më të lartë.
