Është dita e pestë prejse kur janë vendosur këta kamionë në rrugën e cila çon në pikën kufitare në Jarinje. Pavarësisht thirrjeve edhe të emisarit Lajçak, edhe të dërguarit të ShBA-së, Escobar, këto barrikada nuk dihet kur dhe se si do të hiqen.
Situata të mërkurën ishte e qetë edhe në Lagjen e Boshnjakëve në Mitrovicë të Veriut.
Nga aty qytetarët kërkuan që sa më shpejt të hiqen barrikadat.
Ndërsa gjatë ditës Policia e Kosovës, përmes një komunikate për media tha se pavarësisht situatës së rënduar, ky institucion vazhdon të jetë në krye të detyrës.
“Aktet kriminale, vendosja e barrikadave, sulmet me armë zjarri e mjete shpërthyese, kanë vështirësuar punën e institucioneve të sigurisë, kanë cenuar lirinë e lëvizjes së lirë të qytetarëve dhe mallrave, por nuk kanë ndaluar punën e Policisë së Kosovës e cila në vazhdimësi është angazhuar maksimalisht në ofrimin e sigurisë ndaj të gjithë qytetarëve dhe vendit”, thuhet në komunikatën e Policisë.
Policia poashtu demantoi mediat serbe që kishin raportuar se nuk i ishin ofruar barnat ish – policit të arrestuar, Dejan Pantiq.
E pikërisht pas arrestimit të Pantiqit, serbët lokalë ngritën barrikadat të cilat vazhdojnë të jenë aty që nga e shtuna.
Kronika e gazetarit Gojart Jashari.
