Vetëm gjatë muajit qershor të këtij viti, u dhanë tre verdikte për krime lufte.
15 vite burgim i mori Zoran Vukotiq, e 15 vite Zhivojin Nesiq.
E nga akuzat për krime lufte, për shkak të mosvërtetimit të akuzave, u lirua nga përgjegjësia penale Gavrilo Milosavleviq.
Këto janë vetëm disa nga vendimet që departamenti special në Gjykatën Themelore në Prishtinë, ka shqiptuar në gjyqet për krime lufte.
“Vetëm gjashtë muajt e fundit kemi pasur 5 aktgjykime të shkallës së parë për veprat penale të krimeve të luftës. Sigurisht, pas vlerësimit të provave Gjykata apo trupi gjykues kanë marrë vendimet, ashtu siç janë shpallur. Pra, kohëve të fundit kemi pasur edhe aktgjykime dënuese. Por, në disa raste ka pasur edhe aktgjykime liruese për disa vepra penale të krimeve të luftës”, tha Amer Alija nga Fondi për të Drejtën Humanitare.
Përpos këtyre rasteve, edhe dhjetëra gjykime për krime lufte janë në faza të ndryshme gjyqësore.
Pas mundësisë ligjore për gjykim në mungesë, janë shtuar edhe rastet e tilla në Gjykatën Themelore në Prishtinë.
“Nga vitit 2021 deri në muajin Mars 2025 janë ngritur 37 aktakuza ndaj 156 personave. Ndërsa nga po i njëjti vit (2021), deri në muajin mars të 2025-s, kemi 12 aktgjykime fajësuese ndaj 13 personave të dënuar, kurse 2 aktgjykime liruese ndaj 3 personave. Në proces gjyqësor janë mbi 20 raste. Ndërkohë deri në muajin mars 2025, kemi ngritur 14 aktakuza në mungesë, ndërsa janë rreth 12 aktakuza të trashëguara nga EULEX-i që presim të gjykohen në mungesë”, tregoi Arbnor Luta nga Prokuroria Speciale.
Këtë javë u mbajt edhe seanca fillestare në rastin e masakrës së Mejës, ku të akuzuar janë 53 persona dhe gjyqi do të zhvillohet në mungesë.
