Plogështia, dhimbja e trupit , temperatura dhe kolli po bëjnë që shumë qytetarë të drejtohen tek mjeku.
Gripi sezonal, i cili prek të gjithë pa marrë parasysh moshën, ka shkaktuar fluks të shtuar në Qendrat e Mjekësisë Familjare.
E se si po menaxhohen këto raste nga stafi shëndetësor, detaje dha mjekja familjare Shpresa Krasniqi.
“Kohës së fundit kemi rritje të numrit të pacientëve me simptoma të gripit të influencës është rritur numri,mirëpo rastet mirë po menaxhohen nuk ka shumë raste të cilat duhet me u hospitalizuar ose që kanë komplikime, në përgjithësi situata është nën kontroll”.
Krasniqi, madje tregoi se si të veprohet në rast të gripit.
“Të forcohet imuniteti, pra lufta kundër virusit të gripit konsiston në ngritjen e imunitetit të organizimit. Kur një organizëm e ka imunitetin e fortë ai edhe nëse i bjen gripi e kalon shumë më lehtë, po ashtu higjiena personale është baza për parandalim dhe mjekim, pra shmangia e kontaktit me njërit të cilët e kanë gripin”, tregoi ajo.
Dikush madje tregon edhe shkaktarët e gripave, por thonë se vaksinat e gripit sezonal i kanë ndihmuar.
“Ajri shumë i keq është e vijnë gripet”, tha Sherife Zymberi.
“Ne vaksinohemi rregullisht nuk jemi prek nga gripi qe dhjete vite tu i falënderuar vaksinat”, tregoi Nijazi Zymberi.
“Hiç nuk ndalen me rend na bijën, të gjithëve nga pak por me na munduar shumë jo se po dal të eci nga pak”, tha Zenel Canolli.
Kurse si pasojë e këtij gripi, sipas drejtorit të shkollës fillore, “Emin Duraku”, Visar Osmani, edhe nxënësit munguan në bankat e shkollës.
“Këto dy javët e fundit është vërejtur një numër më i lartë i mungesave për shkak të gripit sezonal i cili është shfaqe e i ka godit më shumë fëmijët më të vegjël. Por ka pasur mungesa herë pas herë edhe të stafit për shkak të gjendjes jo të mirë shëndetësore si pasojë e gripit sezonal”.
Megjithatë, Osmani thotë së nuk ka pasur orë të humbura si pasojë e mungesës së stafit të mësimdhënëseve.
