Një 14 vjeçare në shkollën “Tetë marsi” në Pejë është therur me thikë nga shoku i klasës. Gjendja e saj është stabile ndërsa i dyshuar është ndaluar për 24 orë. I njëjti dyshohet që për 3 javë kishte kërcënuar me thikë nxënësit e klasës. Kjo ngjarje ka shqetësuar prindërit e nxënësve.
Ora e “Edukatës Fizike” nuk shkoj mirë për nxënësit e klasës së nëntë në shkollën “Tetë marsi” në Pejë të martën.
Adoleshentët, ishin në sallën e sportit duke u përgatitur për të nisur ushtrimet.
Por, para se nisin orën mësimore, një nxënëse kërkoi leje nga arsimtari për ty kthyer në klasë.
Pasi u kthye, ajo u ther me thikë nga shoku i klasës, i cili sapo kishte ardhur në shkollë.
Nxënësja ka marrë plagën në këmbë por gjendja e saj është stabile.
“14 vjecarja është sjellë këtu në spitalin e përgjithshëm të Pejës nga menaxhmenti i shkollës dhe pas marrjes se trajtimit mjekësor e njëjta është liruar në shtëpi”.
Motivet që dërguan deri tek ky akt nuk dihen, por drejtoresha, Leonora Shoshi, tregon detaje në lidhje me rastin.
“Në klasë ka qenë vajza, e cila ka kërkuar leje prej arsimtarit të “Edukatës Fizike” me qëndruar në klasë për çfarë arsye ato e din Policia dhe arsimtari. Ky nxënës ndërkoha ka ardhur se nuk ka ardh me kohë në shkollë është afruar dhe e ka ekspozuar thikën para nxënëseve prezentë që kanë qenë aty ju ka afru. Nuk kanë pasur konflikt verbal dhe e ka therë, pastaj ai ka dal se e kam përcjelle me kamera dhe e ka mshefë thikën jashtë shkolle. Nuk është lëndim shumë i madh por as i vogël sic kanë thënë disa, se ka mundur me kenë edhe me madhe sipas thikës që është nxënë tek nxënësi”, ka deklaruar ajo.
Nxënësi i klasës së nëntë sipas drejtoreshës kishte disa vërejtje për sjellje.
“Në muajin tetor kur e kemi pas mbledhjen e prindërve është shqiptuar masë disiplinore me shkrim, ku është informuar edhe prindër. Por edhe në vitet paraprake ka qenë nxënës me i lazdruar”, tha ajo.
Madje sipas burimeve të tëvë1, 14 vjeçari dyshohet që 3 javë kishte mbajtur me veti thikën dhe kishte kërcënuar nxënësit e klasës me të.
E menjëherë në vendin e ngjarjes kanë dal edhe Policia e Kosovës.
“Policia ka dalur në vendin e ngjarjes, e ka arrestuar të dyshuarin, viktima është dërguar emergjencën e spitalit për tretman mjekësor. Janë shoqëruar në stacion policor edhe dy dëshmitarë, të cilët janë intervisuar. Është konfiskuar mjeti i mprehtë – thika me të cilën dyshohet se u krye vepra. Është njoftuar Prokurori i Shtetit, i cili ndaj të dyshuarit – nxënës i kësaj shkolle e ka caktuar masën e ndalimit prej 24 orëve”, ka thënë zëdhënësi i policisë, Fadil Gashi.
Ky rast i ndodhur brenda hapësirave të shkollës ka ngjallur shqetësime tek prindërit.
“Shqetësimet e prindërve për rastin që ndodhi në shkollën “Tetë marsi” janë mjaftë të mëdha, Shpresojmë që institucionet të marrin masat që këto raste të mos përsëritën në asnjë shkollë në Kosovë”, ka deklaruar Besim Dragaj nga Këshilli i Prindërve.
Drejtoresha ka thënë se pas këtij rasti i kanë shtuar masat e sigurisë ndonëse sipas saj herë pas herë nxënësit kontrolloheshin.
Tëvë1 ka provuar të marr një qëndrim edhe nga prindërit e 14 vjecares, por ata nuk kanë dashur të flasin.
