Si pasojë e rrëshqitjes së dheut u bllokua segmenti 27 i autostradës “Ibrahim Rugova” në mes komunës së Prizrenit dhe Suharekës.
Gjatë ditës, nuk u lejua asnjë veturë për qarkullim.
Fillimisht Ministria e Infrastrukturës njoftoi për bllokimin e autostradës.
E për të parë së afërmi gjithë situatën, i pranishëm ishte drejtori i departamentit për menaxhim të rrugëve, Qamil Feka.
“Ka ndodh dikur rreth orës 03:10 – 15 rrëshqitja e dheut, menjëherë kemi qenë të informuar, fillimisht kompania mbikëqyrëse ka qenë në vendin e ngjarjes, policia gjithashtu janë informuar, fatmirësisht nuk ka ndodh asnjë aksident me ndonjë pasojë”, tha Feka.
Ai tregoi se fillimisht qëllimi ishte vetëm të intervenohet për t’u hapur rruga.
“Kemi konstatuar që për momentin menjëherë të intervenohet tani, të hapet rruga dhe ne ashtu kështu këtë vit është në buxhet rehabilitimi i skarpateve të autostradës Morinë-Gjorgjicë, ajo do të ndodhë nëpër pjesët tjera, mirëpo këtu tani vendosem që të intervenojmë tani për hapjen e rrugës”, tha ai.
Ana tjetër e autostradës ishte e lirë për qarkullim.
Pikërisht në atë pjesë, policia po vijonte kontrollet me radar.
