Koalicioni i OJQ-ve për Mbrojtjen e Fëmijëve (KOMF) dhe Asociacioni i Qendrave për Punë Sociale i kanë kërkuar kryeministrit Albin Kurti krijimin e një financimi të qëndrueshëm për shërbimet sociale dhe themelimin e Grantit Specifik për Shërbimet Sociale në kuadër të Buxhetit të Kosovës për vitin 2027.
Sipas organizatave, financimi aktual i mbrojtjes sociale është i orientuar kryesisht drejt transfereve monetare, ndërsa shërbimet sociale marrin vetëm një pjesë të vogël të buxhetit.
Të dhënat e prezantuara në kërkesën e tyre tregojnë se gjatë vitit 2024, Kosova shpenzoi rreth 854.6 milionë euro për mbrojtjen sociale, por vetëm 1.6 për qind e kësaj shume u dedikua për shërbimet sociale.
KOMF dhe Asociacioni i Qendrave për Punë Sociale theksojnë se 38 Qendrat për Punë Sociale dhe rreth 50 organizata të licencuara përballen me mungesë të stafit, financimit dhe kushteve të përshtatshme të punës.
Sipas tyre, në komunat e mëdha një zyrtar i QPS-së menaxhon mesatarisht rreth 350 raste aktive në vit, ndërsa në shumicën e komunave Organet e Kujdestarisë nuk janë të kompletuara me pesë profesionistët e paraparë me ligj.
Për këtë arsye, organizatat propozojnë që financimi vjetor për shërbimet sociale të arrijë në 36 milionë euro, nga rreth 20 milionë euro sa ndahen aktualisht.
Kjo do të kërkonte edhe 16 milionë euro shtesë në vit.
Në kërkesën drejtuar Qeverisë së Kosovës, ato propozojnë: Punësimin e 200 zyrtarëve të rinj të shërbimeve sociale në Qendrat për Punë Sociale, investime në infrastrukturë dhe përmirësimin e kushteve të punës, rritjen e buxhetit për organizatat e licencuara që ofrojnë shërbime sociale, miratimin e Grantit Specifik për Shërbimet Sociale në kuadër të Projektligjit për Financat e Pushtetit Lokal dhe finalizimin e kostimit dhe formulës së shpërndarjes së grantit, bazuar në nevojat dhe kapacitetet e komunave.
Organizatat vlerësojnë se krijimi i këtij mekanizmi do të mundësonte financim më të qëndrueshëm dhe mbështetje më të mirë për fëmijët dhe familjet në nevojë në të gjitha komunat e Kosovës./teve1.info/
