Sot u kujtua krimi më i përgjakshëm i regjimit gjenocidal të Milosheviqit, masakra e Krushës së Madhe të Rahovecit.Familjarët e të vrarëve u mblodhën nëpër varrezat e më të dashurve të tyre me lot e dhimbje. E krerët e shtetit njëzëri kërkuan drejtësi për të gjitha krimet që kryen forcat serbe në Kosovë.
Tre vëllezërit, Atife Latifi i ka të varrosur këtu.
Që të tre këta u vranë mizorisht në Masakrën e Krushës së Madhe në Rahovec para 26 vjetësh.
I madhi ishte 27 vjeçar, i dyti 25 e i treti 22.
Dhimbja që ka sot Latifi është e njëjtë sikurse e ajo e 26 marsit të vitit 1999.
“Si dita e atëditshmit që ka qenë ashtu e kujtojmë, neve nuk na doken që janë 26 vjet shumë neve na doket si sot me na i vra. Se dhimbjen e kemi gjithmonë të freskët, kurrë plaga nuk na mshelet se është shumë vështirë tre vëllezër. Ma kanë vra burrin dy javë para vllaznive, e kam pas në UÇK burrin, edhe se ka ditë kerkush që këta janë të vrarë, të madhin e kemi gjet at vit, këta të dy pas 6 viteve”, thotë Latifi.
Sikurse, Atifja dhimbje të tillë kanë edhe familjarë të 243 të vrarëve në masakrën më të madhe që kryen forcat serbe në Kosovë.
Presidentja Osmani tha se familjet e tyre jetojnë çdo ditë më mallin e një pritje që nuk merr fund asnjëherë, duke përmendur edhe veprimtarin Ukshin Hotin për të cilin tha se ende nuk dihet asgjë.
“Sot e kësaj dite edhe 64 të rënë të Krushës së Madhe figurojnë në mesin e të zhdukurve me dhunë, një krim i shumëfishtë i Serbisë gjenocidale. Familjet e tyre jetojnë çdo ditë me dhimbjen me mallin e një pritjeje që nuk merr fund asnjëherë”, u shpreh Osmani.
Edhe kryeministri, Albin Kurti kujtoi të vrarët e të zhdukurit dhe kërkoi drejtësi për krimet nga regjimi gjenocidal i Millosheviqit.
“Ndërmjet 25 dhe 17 marsit 1999, forcat serbe vranë pamëshirshëm 155 civilë shqiptarë. Në mesin e tyre ishin edhe 7 fëmijë e 5 gra. Njëra nga to ishte shtatzënë. Në Krushë të Madhe janë edhe dy krematoriume. Në të parin gjurmët e të cilit janë ende të dukshme, forcat serbe dogjën 19 civilë të pafajshëm shqiptarë e në të dytin në shtëpinë e familjes së Nezir Durakut u dogjën mizorisht mbi 40 të tjerë”, u shpreh Kurti.
E zbardhjen e çdo krimi po e kërkon, i pari i Rahovecit, Smajl Latifi.
“Duhet të gjejmë mënyra e mjete për të zbardhur çdo krim të kryer mbi njerëzit tanë, kjo është më e rëndë se sa vdekja. Besojmë se shteti i Kosovës, Republika jonë do të dijë të iu japë zgjidhje këtyre kërkesave të kohës dhe se historia e vërtetë e këtij populli do të shkruhet ashtu siç e meriton”, tha kryetari i komunës.
64 persona nga Krusha e Madhe ende figurojnë të zhdukur.
Masakra në Krushë të Madhe ishte pjesë e aktakuzës për krime lufte kundër kasapit të Ballkanit, Sllobodan Millosheviq. Përkundër kësaj, drejtësia ende nuk ka vepruar dhe kryerësit nuk janë dënuar.
