Një incident ka ndodhur mbrëmjen e sotme në Han të Elezit, ku një mur mbrojtës është shembur mbi një veturë pasagjerësh në rrugën “28 Nëntori”, duke lënë të bllokuar shoferin brenda automjetit.
Lajmin e ka konfirmuar për teve1.info zëdhënësi i Policisë për rajonin e Ferizajt, Kanun Veseli, i cili ka bërë të ditur se menjëherë pas pranimit të informatës, në vendin e ngjarjes kanë dalë njësitë e Emergjencës dhe njësia e Zjarrfikësve nga Hani i Elezit, të cilët kanë nisur ndërhyrjen për nxjerrjen e personit të bllokuar në veturë.
“Në veturë ndodhej vetëm shoferi, i cili ka qenë me vetëdije, por i ngujuar brenda automjetit”, ka deklaruar Veseli.
Ai ka shtuar se për rastin është njoftuar edhe Njësia e Hetimeve e stacionit policor në Han të Elezit, e cila ka dalë në vendngjarje për të sqaruar rrethanat e incidentit.
Rreth orës 22:00, sipas Veselit, personi është nxjerrë nga vetura nga njësia e zjarrfikësve. I njëjti kishte pësuar lëndime trupore, por ishte në gjendje të vetëdijshme dhe më pas është dërguar nga njësia emergjente për trajtim mjekësor në Qendrën Emergjente të Hanit të Elezit.
Ai konfirmoi se hetimet lidhur me rastin janë duke vazhduar. /teve1.info/
