Shërbimi Spitalor Klinik dhe Universitari i Kosovës ka dhënë detaje të reja për personat që u lënduan mbrëmë në lokalin “Bon Vivant” në Prishtinë.
Për 39-vjeçarin, i cili vdiq si pasojë e plagëve të marra nga arma e zjarrit, ShSKUK thotë se edhe përkundër përpjekjeve maksimale nga stafi mjekësor, i njëjti nuk i përballuar plagët dhe ka ndërruar jetë.
Përmes një njoftimi për media është bërë e ditur se 17 persona mbrëmë kanë kërkuar ndihmë mjekësore, ku 7 prej tyre janë lënduar me armë zjarri dhe 10 me mjete të mprehta.
“5 persona janë pranuar për trajtim të mëtejmë, pas ndihmës mjekësore emergjente në Klinikën Emergjente, si pasojë e lëndimeve që kanë marrë mbrëmë. Prej tyre, 4 janë pranuar për trajtim të mëtejmë në Klinikën e Ortopedisë dhe 1 në Klinikën e Kirurgjisë Vaskulare, të gjithë jashtë rrezikut për jetë. Numri total i pacientëve që kanë kërkuar ndihmë mjekësore, ishte 17. Prej tyre, 7 të lënduar me armë zjarri dhe 10 me mjete të mprehta”, thuhet në njoftimin e ShSKUK-së./teve1.info/
