Kombëtarja e Shqipërisë përballet me Ukrainën mbrëmjen e sontme, në sfidën e fundit për Ligën e Kombeve.
Shqipëria do ta kërkojë fitoren me çdo kusht, për të shpresuar te vendi i parë në grupin B1.
Pas barazimit me Çekinë, kuqezinjtë nuk e kanë më në dorë fatin e vendit të parë, por synohen tre pikët me çdo kusht, për të shpresuar më pas në një barazim në sfidën Çeki-Gjeorgji.
Në “Air Albania”, pritet të jetë një ndeshje shumë e luftuar, për shkak se të dyja kombëtareve iu duhet fitorja.
Shqipëria, edhe këtë herë ka favorin e tifozëve, të cilët edhe në këtë ndeshje do e mbushin stadiumin në kapacitet maksimal, pasi biletat janë shitur të gjitha.
Duke synuar vendin e parë, Shqipëria rrezikon edhe vendin e fundit, në rast se fiton Ukraina, për shkak se të katërta kombëtaret janë afër me pikë.
Megjithatë, pavarësisht rrezikut për të zbritur në Ligën C, trajneri Silvinjo është i qartë dhe në konferencën për shtyp, tha se Shqipëria futet në fushë vetëm për fitore.
Kombëtarja kuqezi e fitoi ndeshjen e parë ndaj Ukrainës me rezultatin 2-1 dhe djemtë kuqezi duan të përsërisin veten.
Në prag të këtij dueli, vendi i parë mbahet nga Çekia me 8 pikë, ndjekur nga Gjeorgjia e Shqipëria me nga 7 pikë, ndërsa Ukraina renditet e fundit me 5 pikë.
Ndeshja Shqipëri-Ukrainë, do të luhet në “Air Albania”, duke nisur nga ora 20:45.
